Umunyarwandakazi witwa Uwumuhoza Violette, yapfiriye muri kasho yo mu mujyi wa Arusha muri Tanzania yari amaze igihe afungiyemo.
Inkuru y’urupfu rwa nyakwigendera wapfuye ku wa Gatatu tariki ya 7 Mutarama, yemejwe na Polisi ya Tanzania mu itangazo iheruka gusohora.
Yavuze ko urupfu rwa Uwumuhoza rwabaye nk’amayobera, kuko hataramenyekana icyaruteye.
Itangazo ry’iyi Polisi rivuga ko hakomeje iperereza rigamije kumenya icyabaye intandaro y’urwo rupfu.
Icyakora raporo yaturutse ku biro bikuru bya Polisi muri Dodoma yavuze ko Uwumuhoza Viollete yaba yiyahuriye aho yari afungiwe, nubwo na byo bigikomeje kwibazwaho.
Uyu mugore utatangajwe imyaka ye yari yatawe muri yombi kubera kwinjira no gutura muri Tanzania mu buryo bunyuranyije n’amategeko, dore ko ngo nta cyangombwa kimwemerera kuhaba yari afite.
