Tarehe 2 Juni 1994, wakati mauaji ya kimbari dhidi ya Watutsi yalikuwa yamefikia kilele chake, Jeshi la FPR (Rwanda Patriotic Front) liliokoa watu maelfu waliokuwa karibu kuuawa.
Hii imethibitishwa na Waziri wa Umoja wa Kitaifa na Majukumu ya Kiraia, Dkt. Jean Damascène Bizimana, kupitia chapisho kwenye X, wakati Wanyarwanda wakiendelea na siku 100 za kumbukumbu ya mauaji ya kimbari dhidi ya Watutsi yaliyofanyika Aprili 1994.
Waziri Dkt. Bizimana alisema:
“Tarehe 2 Juni 1994 ni siku isiyosahaulika kwa wengi. Jeshi la FPR INKOTANYI liliwaokoa maelfu ya Watutsi waliokuwa kwenye hatari ya kuuawa na Interahamwe, Impuzamugambi na wanajeshi wa ex-FAR huko Kabgayi.”
Aliongeza:
“Hiyo ndiyo kambi pekee ambako idadi kubwa ya Watutsi waliokolewa kwa wakati mmoja, ingawa wengine wengi waliuawa njiani wakielekea Kabgayi, hasa kwenye vizuizi vya barabarani kama vile kilichokuwa mbele ya nyumba ya Shingiro Mbonyumutwa huko Gitarama. Watutsi wengine walichukuliwa kutoka kambini Kabgayi na kuuawa, wengine walitupwa mtoni Nyabarongo baada ya kusafirishwa kwa mabasi ya serikali.”
Dkt. Bizimana alimaliza ujumbe wake kwa kuwashukuru wapiganaji wa Inkotanyi kwa kuwaokoa Wanyarwanda wengi ambao wangeangamia kama siyo wao.
Akasema:
“Inkotanyi wa Rwanda, asanteni kwa kuokoa na kulinda Rwanda. Miaka 31 baadaye, Rwanda ni nchi salama na yenye matumaini kwa raia wake. Tuendelee kulinda umoja wetu na kupambana na fikra za mauaji ya kimbari. Wale wanaopotosha historia yetu wasiwe sauti ya taifa letu.”
Siku 100 za kumbukumbu zitakamilika mwezi Julai, mwezi ambao FPR ilihitimisha kabisa mauaji ya kimbari dhidi ya Watutsi nchini kote.
