Tom Byabagamba wambuwe ipeti rya ‘Colonel’ kuri uyu wa 13 Ukwakira 2020, yongeye kwanga kuburana urubanza ashinjwamo kwiba telefone yo mu bwoko bwa Samsung n’indahuzo (chargeur) yayo.
Mu rubanza rwari rugiye kuba hifashishijwe ikoranabuhanga, Tom Byabagamba yasobanuye ko atiteguye kuburana bitewe n’uko kuri uyu wa 12 Ukwakira 2020 ari bwo yabonye dosiye y’ibyo aregwa, akaba ari nabwo yabonanye n’abamwunganira mu mategeko.
Inkomoko y’iki cyaha Tom Byabagamba (wayoboye umutwe w’abasirikare abarinda Umukuru w’Igihugu) ashinjwa ni urubanza yaburanyemo ibyaha byamuhamye, agakatirwa igifungo cy’imyaka 15. Muri urwo rubanza ngo ni ho yibiyemo iyi telefone ya Samsung Galaxy J2 n’indahuzo.
Gusa Tom Byagabamba ubwo yagezwaga mu rukiko bwa mbere tariki ya 21 Nyakanga 2020, ashinjwa iki cyaha cy’ubujura, yaragihakanye, asaba ko urubanza rusubikwa kuko nta bamwunganira mu mategeko yari afite.
Umucamanza yanzuye ko urubanza rwe rusubukurwa tariki ya 14 Nzeri 2020, gusa nabwo ntiyaburanye kuko abamwunganira mu mategeko barabuze.
Umucamanza wemeye gusubika urubanza ashingiye ku mpamvu za Tom Byabagamba, yanzuye ko ruzasubukurwa tariki ya 22 Ukwakira 2020.
