TPLF yasabye ko Turukiya, UAE na Iran bihagarika ubufasha biha Leta ya Ethiopia

Umuyobozi w’umutwe witwaje intwaro wa TPLF uharanira ubwigenge bw’akarere ka Tigray muri Ethiopia, Debretsion Gebremichael yandikiye Umuryango w’Abibumbye awusaba kugira uruhare mu ihagarika ry’ubufasha avuga ko Turukiya, Leta Zunze Ubumwe z’Abarabu (UAE) na Iran biha ingabo za Leta.

Iyi baruwa ifunguye, Gebremichael yayandikiye Umunyamabanga Mukuru wa UN, Antonio Guterres muri iki cyumweru gishize, avuga ko ibi bihugu bitatu bifite uruhare mu ntambara ikomeje hagati yabo na Leta kuko ngo biyiha intwaro n’indege za ‘drones’.

Yasabye Guterres kugira inama ibi bihugu guhagarika ubu bufasha kubera ko ngo intwaro bitanga zigira uruhare mu bitero bigabwa ku basivili. Ati: “Izi ntwaro zikoreshwa mu kugaba ibitero ku basivili kandi ibitero ku basivili byica itegeko mpuzamahanga ribarengera, zinakoreshwa mu gukomeza intambara, bigakomeza guhungabanya umutekano wa Ethiopia.”

Nk’uko tubikesha The East African, ibi bihugu byose uko ari bitatu bihakana uruhare bishinjwa muri iyi ntambara ya Ethiopia, ahubwo Turukiya yo yijeje kunga impande zishyamiranye, ariko nyuma iza kugirana amasezerano y’ubufatanye mu bya gisirikare n’umutekano na Leta.

Gebremichael yandikiye Guterres mu gihe ingabo za Leta ziyobowe na Minisitiri w’Intebe Abiy Ahmed ku rugamba, zivuga ko zimaze kwigarurira uduce twinshi twari twarafashwe na TPLF n’indi mitwe yitwaje intwaro bifatanyije. Utu duce turi mu karere ka Amhara na Afar.