Perezida Félix Tshisekedi Antoine Tshisekedi wa Repubulika Iharanira Demokarasi ya Congo, ategerejwe i Kiev muri Ukraine mu ruzinduko ruzasiga agiranye ibiganiro na mugenzi we w’icyo gihugu Volodymyr Zelensky.
Africa Intelligence yatangaje umutima w’ibiganiro bya Tshisekedi na Zelensky ari amasezerano yerekeye ibinyampeke byo muri Ukraine u Burusiya buheruka guhagarika.
Ni amasezerano yari yashyizweho umukono muri Nyakanga 2022, akaba yaremereraga Ukraine kohereza mu mahanga ibinyampeke (ingano) byayo biciye mu byambu bitatu ifite ku nyanja y’umukara.
Congo Kinshasa cyo kimwe n’ibindi bihugu bya Afurika nka Misiri, bari mu bagombaga kungukira kuri ziriya ngano.
Mbere y’uko Tshisekedi yerekeza i Kiev, muri Kamena uyu mwaka ba Perezida ba Afurika na bo bari berekeje muri uriya murwa mukuru wa Ukraine mu rwego rwo kuganira na Perezida Zelensky.
Aba barimo Macky Sall wa Sénégal, Cyril Ramaphosa wa Afurika y’Epfo, Hakainde Hichilema wa Zambie na Azali Assoumani w’ibirwa bya Comores.
Perezida Yoweri Kaguta Museveni yari ahagarariwe na Ruhakana Rugunda wahoze ari Minisitiri w’Intebe wa Uganda.
Congo Kinshasa isanzwe ari inshuti ya Leta Zunze Ubumwe za Amerika, ndetse kugeza magingo aya iracyari ku ruhande Amerika ihagazeho mu makimbirane yo muri Ukraine.
Incuro nyinshi Kinshasa yakunze gushyigikira imyanzuro y’Umuryango w’Abibumbye yamagana intambara u Burusiya bwashoje kuri Ukraine.
Usibye kujya kuganira na Zelensky, Perezida Tshisekedi anategerejwe i St Petersburg mu Burusiya, ahateganyijwe kubera inama ihuza u Burusiya n’umugabane wa Afurika.
Iyi nama izaba iba ku ncuro yayo ya kabiri iteganyijwe kuba hagati y’itariki ya 27 n’iya 28 Nyakanga, ikaba yarateguwe na Perezida Vladimir Putin.
Tshisekedi akomeje kubagarira yose
Perezida wa RDC ategerejwe i Kiev mu gihe kuva muri 2019 ubwo yageraga ku butegetsi, yakunze kugerageza gucudika n’u Burusiya mu rwego rwo gukurura abashoramari bo muri iki gihugu, n’ubwo bitigeze bimuhira.
Moscou cyakora cyo yakunze kugaragaza ko yifuza umubano wa dipolomasi n’uwa gisirikare hagati yayo na Kinshasa, ibyatumye inayihatira kugura ibikoresho byayo bya gisirikare.
I Moscou kandi Minisitiri w’Ububanyi n’Amahanga w’u Burusiya, Sergei Lavrov asanzwe afitanye umubano mwiza na Ambasaderi wa RDC, ku buryo hari n’ubushake bwo gufasha Kinshasa kwinjira mu miryango itandukanye irimo n’uwa BRICS u Burusiya buhuriyemo n’ibihugu nka Brésil, u Bushinwa na Afurika y’Epfo.
