Perezida wa Repubulika Iharanira Demokarasi ya Congo, Félix Antoine Tshisekedi, yandikiye ibaruwa ifunguye umugore wa Moustapha Bilambo, umushoferi w’Ishami ry’Umuryango Mpuzamahanga wita ku biribwa, PAM uheruka kwicanwa na Ambasaderi w’Ubutaliyani.
Ku wa Mbere tariki ya 22 Gashyantare ni bwo Bilambo yishwe ari kumwe na Luca Attanasio, Ambasaderi w’Ubutaliyani muri Repubulika Iharanira Demokarasi ya Congo wari kumwe n’umurinzi we.
Uko ari batatu biciwe hafi y’Umujyi wa Goma ho mu ntara ya Kivu y’Amajyaruguru.
Perezida Tshisekedi mu baruwa yandikiye umupfakazi wa Bilambo, yamwihanganishije anamwizeza ko hazakorwa ibishoboka byose abari inyuma y’urupfu rwe bakabiryozwa.
Ati: “Iki gitero kandi cyahitanye ubuzima bwa Ambasaderi Luca Attanasio n’umurinzi w’Umutaliyani witwa Vittorio Lacovacci (…) kubura umugabo wawe Milambo biteye agahinda kuko ari akarengane, bitera umubabaro no kutiyumvisha ibintu. Mu byukuri, ntawe ushobora kwemera ko umunyagihugu agwa mu bugome bw’umwanzi ku butaka bwe “.
Perezida Tshisekedi yunzemo ati: “Muri iki gihe cy’icyunamo, ndabamenyesha Madamu Milambo, mu izina ryanjye bwite no mu izina ry’abaturage ba Congo ko mbihanganisha cyane kandi ndabizeza ubushake bwa guverinoma ya DRC bwo gukora ibishoboka byose kugira ngo abagize uruhare mu ishyirwa mu bikorwa ry’iki gikorwa gisuzuguritse bagaragazwe.”
Magingo aya iperereza rirakomeje kuri kiriya gitero cyabereye mu gace ka Kibumba.
Ni iperereza ririmo gukorwa n’ishami ry’umuryango w’abibumbye rishinzwe amahoro n’umutekano (UNDSS) hamwe na za Leta y’Ubutaliyani na Repubulika Iharanira Demokarasi ya Congo.
Kurikira ibiganiro n’amavidewo binyura kuri Bwiza TV
