Minisitiri w’Intebe w’u Budage, Angel Merkel yatanze uburenganzira bwo gusubukura shampiyona z’umupira w’amaguru, icyiciro cya mbere n’icya kabiri (Bundesliga, Bundesliga 2) muri uku kwezi n’ubwo abakinnyi 10 baherutse kugaragaraho icyorezo cya Covid-19.
Umwanzuro ku itariki imikino izasubukurirwa irafatwa n’ishyirahamwe ry’umupira w’amaguru kuri uyu wa kane tariki ya 7 Gicurasi 2020 nk’uko byemejwe n’Umuyobozi waryo, Christian Seifert.
Ku wa mbere tariki ya 4 Gicurasi 2020, abakinnyi, abatoza ndetse n’abandi bayobozi bari mu makipe 36 y’icyiciro cya mbere n’icya kabiri cya shampiyona barapimwe bose, 10 bagaragaraho iki cyorezo. New York Post yatangaje ko abapimwe bose ari 1724.
Bundesliga na Bundesliga 2 ni yo marushanwa ya mbere akomeye ku mugabane w’u Burayi araba asubukuwe gusa imikino izajya iba nta bafana bari muri sitade mu rwego rwo gukomeza kwirinda ikwirakwira rya Covid-19.
Bundesliga yari yasubitswe isigaje imikino icyenda. Yari iyobowe na Bayern Munich n’amanota 55, Borussia Dortmund iri ku mwanya wa kabiri n’amanota 51.
