Mu gace ka Karichedu gaherereye mu gihugu cy’u Buhinde, abantu icyenda banyoye umuti wica udukoko(Sanitizer) urabica, nyuma y’aho amaduka acuruza inzoga afungiwe kubera icyorezo cya Covid-19.
Aba bantu uko ari 9 bishwe n’umuti wica udukoko bivugwa ko bawunyoye bawuvanga n’amazi na fanta. Umuyobozi wa Polisi ya Leta ya Andhra Pradesh, Siddhararth Kaushal yasobanuye ko aba bantu bapfuye biganjemo urubyiruko rwo mu karere ka Kurichedu . Nyuma yo kunywa iyi miti bahise bata ubwenge, bajyanwa mu bitaro bya Kurichedu ari naho baguye.
Leta ya Andhra Pradesh yahagaritse icuruzwa ry’inzoga mu minsi mike ishize, bivugwa ko aba bapfuye bagerageza gusimbuza iyi miti inzoga bamaze iminsi batabona.
Abantu bagera ku majana muri aka gace basanzwe bapfa bazize kunywa inzoga zanduye buri mwaka. Aha muri aka gace kandi abantu babarirwa mu 1,000 ku mwaka bicwa n’indwara zituruka ku nzoga zongerewe ubukana hifashishijwe amavuta y’ibinyabiziga(Petrol).
Aha mu Buhinde kugeza ubu abamaze kwicwa na Covid-19 bamaze kurenga 35,000, mu gihe abamaze kwandura Covid-19 aha mu Buhinde bagera kuri miliyoni 1.63. Ibi bituma igihugu cy’u Buhinde kiza ku mwanya wa gatatu mu kugira ubwandu bwinshi ku Isi nyuma ya Leta zunze Ubumwe z’Amerika na Brazil.
