U Burundi buvuga ko butazigera bushishikariza abaturage kwikingiza Covid-19

Uyu muyobozi yabitangarije imbere y’abandi bayobozi mu gihugu, asobanura iby’izi nkingo u Burundi bwemeye kwakira. Yagize ati: “Amafirigo twarayateguye. Mutuzanira tubike, Umurundi uzumva ashaka urukingo, azitura ababishinzwe, bamutere urwo rukingo ku bushake bwe. Ibizamubaho, ntazabaze Leta.”

Abari mu cyumba yatangiyemo ibi bisobanuro bahise baseka, ari nako bamukomera amashyi. Yakomeje ati: “Leta rero ntiyavuze ko igiye kuzana urukingo rwo gukingira abantu. Yavuze ko Leta ari umubyeyi, abifuza bose ko badufasha urukingo, ni ukuri baradukunda turabashimiye! Nibatuzanire urwo rukingo, turubike, Umurundi uzarukenera, ajya ababwira ati ‘nimuntere agashinge’, bahite bamutera.”

Yasubiyemo ko uzemera guterwa urushinge, ntacyo agomba kuzabaza Leta ku ngaruka zizamugeraho. Ati: “Ntazabaze Leta ku ngaruka bizamugiraho kandi n’uzatunanira urwo rukingo, ntagire ifaranga na rimwe asaba Leta, nta na rimwe. We arazana, akakera ku kibuga cy’indege, tukakira, twakiye tugahita tumwandikira n’akandiko ko kumushimira.”

Ibi byose Minisitiri Ndirakobuca yatangaje, byaganiriweho mu nama y’abaminisitiri yateranye kuri uyu wa 28 Nyakanga 2021 nk’uko yabisobanuriye aba bayobozi. Ati: “Ni ibyo twize mu nama y’ejo, mutange ubutumwa neza.”

Ntibisanzwe kuko bizwi ko mu gihe igihugu gihawe inkingo za Covid-19, hakurikiraho ubukangurambaga mu baturage kugira ngo bikingize. Akenshi usanga abayobozi bakuru nk’abakuru b’ibihugu na ba Minisitiri b’Ubuzima ari bo bakingirwa bwa mbere kugira ngo bemeze abaturage ko nta mpungenge urukingo ruteye.