Umukinnyi rurangiranwa wa filimi z’isoni nke zizwi nka ‘porno’ witwa Rocco Antonio Tano wamamaye nka Rocco Siffredi aherutse gutangaza ko afite umugambi wo kwiyamamariza umwanya wa Perezida wa Repubulika y’uButaliyani.
Abicishije muri videwo yatambukije ku rubuga rwe rwa Instagram tariki ya 20 Mutarama 2022, Rocco Siffredi yatangaje ko abona yarakoreye byinshi byiza Abataliyani kurusha abandi banyapolitiki bose, ku buryo akwiye iyi ntebe isumba izindi mu gihugu cyabo.
Yagize ati: “Nyuma yo kurangiza inshingano kwa Perezida wacu, nafashe icyemezo cyo gutangaza kandidatire yanjye ku mwanya wa Perezida wa Repubulika.”
Siffredi yakomeje ati: “Maze imyaka 30 mvuna umugongo mushimisha, nakoreye iki gihugu ibyiza kurusha umunyapolitiki uwo ari we wese mu mateka. Ngaho nimumfashe kugera ku nzozi zanjye muhererekanya iyi videwo ku mbuga zanyu. Dutangiye igikorwa cyo kwiyamamaza: Rocco Perezida.”
Gusa aya matora yarangiye kuri uyu wa 29 Mutarama 2022 byarangiye yegukanywe na Sergio Mattarella usanzwe ayobora u Butaliyani.
