U Rwanda rugiye kwakira inama y’Ihuriro Mpuzamahanga ryita ku iterambere ry’ubuhinzi muri Afurika, AGRF (African Green Revolution Forum, AGRF). Iyi nama ikaba izaba ibaye ku nshuro yayo ya cumi, bikaba ubwa mbere u Rwanda ruyakiriye.
Iri huriro ryatangaje ko iyi nama mu buryo bw’ikoranabuhanga rihuza amashusho bitewe n’icyorezo cya Covid-19, ikazaba ihuza abagera ku 2000 baturutse mu bihugu bitandukanye ku Isi barimo abahagarariye za guverinoma, sosiyete sivile, abikorera ndetse n’abashakashatsi, urubyiruko rwihangiye imirimo n’abandi bafatanyabikorwa mu iterambere.
AGRF Summit 2020 izaba igamije kwigira hamwe ingamba z’uburyo ibihugu by’Afurika byakwihaza mu biribwa by’umwihariko abatuye mu Mijyi itandukanye.
Ni inama y’iminsi itatu izaba guhera ku itariki 08 kugeza 11 Nzeri 2020, ikazakirirwa muri Kigali Convention Center naho abazayitabira bo hanze y’igihugu bakabaza bayikurikira ku ikoranabuhanga nk’uko Minisitiri w’Ubuhinzi n’Ubworozi mu Rwanda, Dr Gerardine Mukeshimana yabitangarije iri huriro.
Iyi nama yahawe insanganyamatsiko ivuga “Tugaburire imijyi, tuzamure Umugabane-Tubyaza umusaruro amasoko y’ibiribwa mu Mijyi kugirango tugere ku iterambere rirambye muri Afurika.”
AGRF itangaza ko impamvu insanganyamatsiko y’uyu mwaka yibanze ku ngamba zo kongera ibiribwa mu mijyi ari uko Ishami ry’Umuryango w’Abibumbye ryita ku buhinzi n’ibiribwa, FAO ritangaza ko muri 2025 abarenga 61% by’abatuye isi bazaba batuye mu mijyi, naho mu 2050 abarenga ½ cy’abaturage bo mu bihugu byo munsi y’Ubutayu bwa Sahara bakazaba batuye mu mijyi bityo hakaba hari umugambi wo kuzamura imibereho y’abazaba bayituyemo binyuze mu mirire iboneye.
