Komisiyo y’ubujurire mu ishyirahamwe ry’umupira w’amaguru mu Rwanda, yateye utwatsi ubujurire bw’amakipe ya Gicumbi FC na Heroes FC ivuga ko “nta mpamvu zemewe n’amategeko” ziriya kipe zashingiyeho zijurira.
Ku wa 22 Gicurasi ni bwo Ferwafa yafashe icyemezo cyo gusoza shampiyona y’ikiciro cya mbere mu Rwanda itarangiye, kubera icyorezo cya Covid-19.
Shampiyona yasojwe APR FC yari iya mbere ku rutonde rwa Shampiyona ihawe igikombe cya shampiyona, Heroes na Gicumbi zari iza nyuma zimanurwa mu kiciro cya kabiri. Ni icyemezo amakipe yombi atishimiye ahitamo kukijuririra asaba ko cyateshwa agaciro.
Komisiyo ishinzwe ubujurire muri Ferwafa iyobowe na Kajangwe Joseph, yateranye ku ya 5 Kamena 2020 ku cyicaro gikuru cya FERWAFA i Remera, yanzuye ko “ubujurire bwatanzwe na Heroes FC na Gicumbi FC ku cyemezo cya Komite Nyobozi ya FERWAFA cyo ku ya 22 Gicurasi 2020 nta mpamvu zemewe n’amategeko bwashingiyeho.”
Iyo Komisiyo yemeje icyemezo cya komite nyobozi ya FERWAFA cyo ku ya 22 Gicurasi 2020, cyo kumanura amakipe ya Gicumbi na Heroes mu kiciro cya kabiri.
