Ubushinwa bwarashe ibisasu bya misile hafi ya Taiwan, bijyanye n’imyiyereko yakurikiye uruzinduko rw’umukuru w’inteko ishingamategeko y’Amerika Nancy Pelosi kuri icyo kirwa. Taiwan yavuze ko Ubushinwa bwarashe misile 11 zo mu bwoko bwa ‘ballistic’ mu mazi ari mu nkengero z’inkombe zo mu majyaruguru ashyira uburasirazuba no mu majyepfo ashyira uburengerazuba bwa Taiwan. Ni inkuru yagarutsweho n’ibitangazamakuru bitandukanye byo muri Aziya n’Uburengerazuba. Ubuyapani bwavuze ko misile eshanu z’Ubushinwa zaguye mu mazi y’Ubuyapani, busaba ko iyo myiyereko “ihagarara aka kanya”. Ubushinwa bwabonye urwo ruzinduko rwa Pelosi nk’imbogamizi ku cyo buvuga ko ari uburenganzira bufite kuri Taiwan. Ubushinwa bubona Taiwan nk’intara yabwikuyeho, izageraho ikabusubizwaho – no ku ngufu bibaye ngombwa. Ku ruhande rwayo, Amerika ntiyemera byeruye Taiwan, mu bigaragara yigenga kuva mu mwaka wa 1950. Ariko Amerika ifitanye umubano ukomeye n’iki kirwa. Uwo mubano urimo no kugurisha intwaro kuri Taiwan zo gutuma yirwanaho.
