Umugaba Mukuru w’Ingabo z’Ubwongereza, Sir Richard Knighton, yatangaje ko igihugu cye kiri mu gihe cy’umutekano muke kurusha ibindi byose yabonye mu myaka 35 amaze mu gisirikare.
Mu kiganiro yagiranye na BBC, Knighton yavuze ko ibikorwa by’u Burusiya birimo ibitero by’ikoranabuhanga (cyber attacks), ibikorwa byo gusenya ibikorwa remezo, ubutasi ndetse n’ubwicanyi bwateguwe, bikomeje gushyira igitutu ku bihugu byo mu Burengerazuba bw’Isi.
Yavuze ko Ubwongereza bugomba kongera ubushobozi bw’ingabo zabwo no gushora amafaranga menshi mu ikoranabuhanga rya drones, kuko zizagira uruhare rukomeye mu ntambara z’ahazaza.
Ati: “Mu myaka 35 maze mu gisirikare, iki ni cyo gihe cy’akaga gakomeye nabonye. Tugomba kwitegura intambara zishobora kumara igihe kirekire kurusha uko twabimenyereye.”
Ibi bije mu gihe intambara hagati y’u Burusiya na Ukraine ikomeje gukaza umurego, ndetse n’ibihugu byo muri NATO bikomeje gushimangira gahunda zo kwirinda ibishobora guhungabanya umutekano wabyo.
Minisitiri w’Intebe w’Ubwongereza, Sir Keir Starmer, na we yatangaje ko igihugu cye kiri gutegura gahunda nshya yo kongera amafaranga ashorwa mu rwego rw’ingabo mbere y’inama ya NATO iteganyijwe muri Nyakanga.
