Ikipe ya Urartu FC ikinamo myugariro w’Ikipe y’Igihugu ‘Amavubi, Nirisarike Salomon, na Dila Gori FC ya Manzi Thierry, zasezerewe mu irushanwa rishya rya UEFA Conference League zitarenze ijonjora ry’ibanze. Urartu FC n’iyo mu gihugu cya Armenia mu gihe Dila Gori FC ya Manzi wakiyikiniraga umukino wa mbere ari iyo muri Georgia. Manzi Thierry na bagenzi be ku munsi w’ejo bashoboye gutsinda MĹ K Ĺ˝ILINA yo muri Slovakia ibitego 2-1, gusa ibasezerera ku giteranyo cy’ibitego 6-3 kuko mu mukino ubanza yari yabanyagiye ibitego 5-1. Manzi Thierry muri uyu mukino yinjiye mu kibuga ku munota wa 73 asimbura. Salomon Nirisarike na bagenzi be bo basezerewe nyuma yo gutsindwa na Maribor FC yo muri Slovenia igitego 1-0, ibasezerera ku giteranyo cy’ibitego 2-0 kuko no mu mukino ubanza yari yabatsinze igitego 1-0. Ikipe yabashije kurenga ijonjora ni FC Shkupi ya myugariro Rwatubyaye Abdul yanganyije na Llapi yo muri Kosovo igitego 1-1, gusa iyisezerera ku giteranyo cy’ibitego 3-1 kuko mu mukino ubanza wari wabereye muri Macedonia y’amajyaruguru Abdul na bagenzi be bari batsinze ibitego 2-0, birimo kimwe cye.
