UEFA CL: Cristiano Ronaldo yagejeje Man United muri 1/8, FC Barcelona ijya mu mazi abira

Ikipe ya Manchester United yaraye igeze muri 1/8 cy’irangiza cya UEFA Champions league, nyuma yo kujya gutsindira Villarreal muri Espagne ibitego 2-0.

Igitego cyo ku munota wa 78 w’umukino cya Cristiano Ronaldo n’icyo ku munota wa 90 w’umukino cya Jadon Sancho, byari bihagije kugira ngo Manchester United ikatishe itike ya 1/8 mbere yo guhura na Young Boys mu mukino wa nyuma wo mu tsinda.

Kuri ubu Manchester United iyoboye itsinda F n’amanota 10, ikaba irusha atatu Villarreal iyikurikiye.

Manchester United yageze muri 1/8 cy’irangiza, nyuma yo gufashwa cyane na Cristiano Ronaldo.

Uyu munya-Portugal amaze gutsindira iyi kipe ibitego bitandatu mu mikino itanu yo mu tsinda amaze kuyikinira.

Indi kipe yashoboraga kugera muri 1/8 bikayinanira ni FC Barcelona yo muri Espagne.

Iyi kipe yari yakiriye Benfica mu mukino yasabwaga gutsinda ikazamukana na Bayern Munich, gusa birangira amakipe yombi aguye miswi 0-0.

Kuri ubu FC Barcelona irasabwa kujya gutsindira Bayern Munich mu Budage, cyangwa Benfica igatsindwa na Dynamo Kyiv cyangwa zikanganya.

Uko imikino yose yagenze