Ikipe ya Paris Saint-Germain yo mu Bufaransa na Chelsea yo mu Bwongereza zageze muri 1/2 cya UEFA Champions league, nyuma yo gusezerera amakipe ya Bayern Munich yo mu Budage na FC Porto yo muri Portugal.
Bayern Munich mu ijoro ryakeye yatsindiye PSG mu Bufaransa igitego 1-0, gusa iki gitego cyo ku munota wa 40 w’umukino cya Eric Maxim Choupo-Motting nticyari gihagije ngo iyi kipe ifite igikombe cya Champions league iheruka igere muri 1/2 cy’irangiza muri uyu mwaka.
Impamvu ni uko PSG ibifashijwemo na Kylian MbappĂ© cyo kimwe na Marquinhos yari yagiye kuyitsindira mu Budage ibitego 3-2, byatumye amakipe yombi anganya igiteranyo cy’ibitego 3-3; gusa PSG itambuka ibifashijwemo n’ibitego byinshi yatsindiye hanze.
Iyi kipe y’umutoza Mauricio Pochettino yihoreraga kuri Bayern Munich yayitsinze umwaka ushize igitego 1-0, ikayitwara igikombe cya UEFA Champions league.
Ni Bayern Munich kuri iyi nshuro yari idafite Rutahizamu Robert Lewandowski cyo kimwe na Serge Gnabry batanagaragaye mu mukino ubanza kubera imvune.
Uretse PSG yakatishije itike ya 1/2 cy’irangiza, indi kipe yateye iyi ntambwe ni Chelsea yo mu gihugu cy’Ubwongereza.
Iyi kipe y’umutoza Thomas Tuchel yaraye itsinzwe na FC Porto igitego 1-0 (cya Mehdi Teremi), gusa ifashwa no kuba mu mukino ubanza yari yatsinze ibitego 2-0 byatumye ikomeza ku giteranyo cy’ibitego 2-1.
Ni ibitego Chelsea yari yatsindiwe na Masson Maunt cyo kimwe na Ben Chilwell.
Andi makipe abiri agera muri 1/2 cy’irangiza ategerejwe kuri uyu wa Gatatu, hagati ya Liverpool yakira Real Madrid yayitsinze ibitego 3-1 mu mukino ubanza wabereye i Madrid, na Borussia Dortmund yakira Manchester City yayitsindiye mu Bwongereza ibitego 2-1.
