Prof. Kajabago Karusoke, Umujyanama Mukuru mu by’ingengabitekerezo wa Perezida Yoweri Museveni wa akaba n’umwarimu mu Ishuri National Leadership Institute ry’i Kyankwanzi, yitabye Imana azize icyorezo cya Virusi ya Corona.
Prof. Kajabago yapfuye ejo ku wa Mbere aguye mu bitaro bya Victoria, mu gace ka Bukoto nk’uko byemejwe n’ishyirahamwe The Pan-African Pyramid yari abereye umunyamuryango, mu itangazo ryasohoye.
Uyu muryango wagereranyije Prof. Kajabago nka “Encyclopedia [Inkoranyamagambo y’indimi byinshi]” ya Afurika, yihanganisha umuryango we.
Iyi nararibonye yishwe na Covid-19, mu gihe iki cyorezo gikomeje kugarika ingogo mu gihugu cya Uganda.
Abandi bakomeye baheruka guhitanwa na cyo vuba barimo Capt. Alex Opolot wahoze mu barinda Perezida Museveni, Patrick Besigye Keihwa wahoze ari umuyobozi w’akarere ka Kabale, Dr Stephen Ssebudde wari umuyobozi w’ibitaro by’akarere ka Kanungu, Kagole Kivumbi wabaye Umunyamabanga w’urwego rwa Uganda rushinzwe ubutabera, n’abandi benshi.
Aba bose bakomeje kwitaba Imana mu gihe Uganda iri mu kiciro cya kabiri cy’izamuka rikabije ry’ubwandu bwa COVID-19.
Muri iki gihugu kuri ubu harabarurwa abarenga 63,000 bamaze kwandura kiriya cyorezo, n’ababarirwa muri 434 kimaze kwica.
Mu rwego rwo gukumira ubwiyongere bw’iki cyorezo, Perezida Yoweri Kaguta Museveni yashyizeho ingamba zikwiye kumara iminsi 42 zasize ibikorwa hafi ya byose bihuriza hamwe abantu benshi bifunzwe.
Kurikira ibiganiro n’amavidewo binyura kuri Bwiza TV
