Muri iki cyumweru gishize, ahitwa Muyenga, mu nkengero za Kampala mu gihugu cya Uganda, abasirikare bo mu mutwe ushinzwe kurinda umukuru w’igihugu, bagiranye amakimbirane n’abapolisi kugeza ubwo babatunga imbunda nyuma y’aho aba bari bamaze gufata abacuruzi ba zahabu ya cyabakanga.
Uwabibonye n’amaso ye wari aho ibi byabereye yahishuriye spyreports ko amakimbirane yatangiye abapolisi bari bayobowe na ASP Alex Tumuhairwe bajyaga guta muri yombi abacuruzi babiri ba zahabu (ya fake) bitwa Kajubi Quim na Ndagimana Lawrence bari batekeye umutwe abapolisi babiri bafite ipeti rya komiseri bakabatwara akayabo ka miliyoni 300 z’amashilingi nyuma yo kubaha zahabu itari iya nyayo.
“ Abo babiri bakekwa batekeye umutwe wa miliyoni 300 abakomiseri bacu kuri zahabu ya fake mu Ugushyingo umwaka ushize, kandi twari turi kubashakisha ,” uyu ni umwe mu bapolisi bakorera muri URSB (Uganda Registration Service Bureau). Yongeyeho ko igipolisi cyariwe urwara ko abo bantu cyari kimaze iminsi gishaka bari gutuburira abazungu muri Muyenga babaha zahabu ya fake.
“ Twihutiye kujya gufata abakekwa mbere y’uko babasha kuhava. Ariko icyadutunguye tugeze ku irembo ry’ibiro byabo, ryari ririnzwe na sgt wo muri SFC (Special Forces Command) ,” uyu ni undi mu polisi wari mu bari bagiye guta muri yombi abo batekamutwe.
Uyu mupolisi akomeza avuga ko ASP Tumuhairwe yategetse ko n’uwo musirikare wa SFC atabwa muri yombi nyuma binjira mu biro bahasanga abasirikare bakuru basaga batanu bo muri uyu mutwe ushinzwe kurinda perezida Museveni bari kwakira amamiliyoni y’amashilingi ngo bajye barindira umutekano abo batubuzi.
Mu kwinjira ngo ASP Tumuhairwe yahise agira ati: “ Mwese murahagaritswe, kuki muri gusaranganya amafaranga, ubundi ni ay’iki ?”
Umupolisi wari aho avuga ko ubwo Tumuhairwe yategekaga kubata muri yombi, abo basirikare bahise bakuramo imbunda zabo zo mu bwoko bwa pistols bakamubwira ko niyibeshya bamurasiraho.
Aba basirikare ngo bakaba baragize bati: “ Twe turi ba ofisiye ba SFC kandi ntitwabemerera mwe abapolisi kuduta muri yombi cyangwa kugira aho mujyana uwo ari we wese muri aba bantu .”
Amakuru arakomeza avuga ko ASP Tumuhairwe we yakomeje gutsimbarara avuga ko bagomba gutabwa muri yombi bose, abo basirikare bafata telephone bahamagara mugenzi wabo w’ipeti rya Col ngo abatabare. Mu kuhagera, uyu mu colonel yabujijwe kugera mu cyumba abo basirikare n’abo batekamutwe bari babaye babitswemo.
Biiravugwa ko guterana amagambo byamaze amasaha agera kuri ane, maze uwo mu colonel ahamagara umupolisi Elly Womanya, wungirije umuyobozi wa CID ashinzwe iperereza ridasanzwe ngo amufashe muri iki kibazo. Ati: “ Afande Womanya mfasha ubwire abapolisi bawe barekure abasirikare ba SFC kubera ko bajyanywe kuri polisi muri aya mahano, Afande Muhoozi yabagirira nabi ,”
Bikavugwa ko afande Womanya yaje guhamagara ASP Tumuhairwe akamusaba kurekura abo basirikare agasigarana abo batekamutwe. Abo batekamutwe bakaba bo barahise bajyanwa ku cyicaro cya polisi cya Kampala mu gihe iperereza rikomeje ku byaha bakurikiranweho.
