Guverinoma ya Uganda yabujije abanyapolitiki kugaragara mu itangazamakuru bambaye ingofero zitukura cyangwa indi myambaro iriho ibirango bigaragara nk’ibyatera urujijo hagati y’abasivili n’inzego z’umutekano.
Umuvugizi wa Guverinoma ya Uganda, Ofwono Opondo yabwiye Chimpreports ko uyu ari umwe mu myanzuro yafatiwe mu nama y’abafite ibigo by’itangazamakuru n’inzego zinyuranye z’umutekano, hagamijwe kunoza imigendekere myiza y’amatora ateganijwe muri Mutarama umwaka 2021.
Ni inama yabereye ku cyicaro cy’urwego rw’ubutasi CMI i Kampala yitabirwa na Gen. Sabiiti Muhoozi wari uhagarariye ingabo, Sabiiti Muzeyi wari uhagariye Polisi n’umuyobozi w’amagereza, Johnson Byabashaija.
Muri iyi nama, inzego z’umutekano n’abayobora ibitangazamakuru muri Uganda bemeranyijwe ko nta munyapolitiki wemerewe kugaragara kuri Televiziyo, ibinyamakuru cyangwa Radiyo yambaye imyambaro ishobora gutera urujijo mu baturage, nk’ingofero zitukura (Zisanzwe zambarwa n’umutwe ushinzwe imyitwarire mu gisirikare/Military Police) .
Ofwono yakomeje avuga ko ikigo cy’itangazmakuru kitazubahirizwa ibyavuye muri iyi myanzuro gisabwe kwirengera ingaruka n’ibihano kizafatirwa.Yagize ati: “Utazubahiriza aya amabwiririza uko ari azirengere n’ingaruka ku bihano bizamugeraho.”
Ingabo za Uganda zimaze iminsi zitangije igikorwa cyo gushaka ibikoresho n’imyambaro bisa n’ibyagisirikare mu baturage. Ubusanzwe ingofero z’umutuku n’ibindi bikoresho bifite ibirango bya giririkare bikunze gukoreshwa n’abayoboke b’ishyaka National Unity Platform rya Robert Kyagulanyi uzwi nka Bibi Wine umwe mu bahatanira umwanya w’umukuru wigihugu mu matora ataha.
