Uwahoze ari umukuru w’igipolisi cya Uganda, Gen Kale Kayihura, kuri uyu wa Gatanu yagejejwe imbere y’Urukiko Rukuru rwa Gisirikare rwa makindye ashinjwa ibyaha bitatu birimo kunanirwa kurinda ibikoresho by’intambara, gushimuta abantu no gucyura impunzi ku ngufu.
Mu gitondo cyo kuri uyu wa Gatanu, itariki 24 kanama nibwo Gen kale Kayihura watawe muri yombi kuwa 13 Kamena, yagejejwe imbere y’Urukiko Rukuru rwa Gisirikare rwa Makindye.
Yashinjijwe ibyaha bitatu birimo kunanirwa kurinda ibikoresho by’intambara (imbunda), aho ngo hagati ya 2010 na 2018 yatanze amabwiriza yo guha imbunda abantu batazikwiriye barimo abo mu mutwe wa Boda Boda 2010 uyoborwa n’uwitwa Abdallah Kitata, kunanirwa kugenzura imbunda zahawe umutwe wa Flying Squad w’igipolisi n’umutwe w’ubugenzacyaha wa polisi na none hagati ya 2010 na 2018 no kugira uruhare mu ishimuta no gucyura ku ngufu impunzi z’Abanyarwanda hagati ya 2012 na 2016.
Gen Kale Kayihura winjiye mu rukiko afite akamwenyu ku maso mu mpuzankano ya gisirikare arinzwe bikomeye n’abashinzwe disipuline mu gisirikare, ibyaha byose yashinjijwe yabihakanye nk’uko NTV dukesha iyi nkuru ikomeza ivuga.
Abamwunganira mu mategeko bahise basaba ko yakomeza gukurikiranwa adafunze, urukiko rubasaba gukora ubusabe bwanditse buzasuzumwa kuwa 28 Kanama.
Biteganyijwe ko urubanza ruzasubukurwa kuwa 04 Nzeri 2018.
