Inzego z’umutekano za Uganda zataye muri yombi abanyamahanga barenga 1.000, abenshi muri bo bakaba ari Abashinwa, mu byo abantu bavuze ko ari kimwe mu bikorwa bikomeye mu gihugu birwanya itsinda ry’abagizi ba nabi mpuzamahanga bashinjwa gutegura uburiganya bwo kuri interineti, kwinjira mu bikorwa remezo by’ingenzi mu buryo butemewe no gukoresha “call centers” zitemewe.
Iki gikorwa gihuriweho, kiyobowe n’Ubuyobozi bushinjwe Iperereza ku byaha (CID), cyakorewe ahantu henshi hirya no hino mu turere twa Kampala na Wakiso, harimo na Kingdom Resort Katomi mu Karere ka Wakiso, umutungo ufitanye isano n’uwahoze ari Visi Perezida Gilbert Bukenya, nk’uko bivugwa n’abo mu nzego zitandukanye z’umutekano zakoze iperereza.
Abakorera izo nzego, basabye ko amazina yabo adatangazwa kubera ko badafite uburenganzira bwo gutanga amakuru, bavuze ko abakekwaho icyaha bagera kuri 430 bafatiwe muri Kingdom Resort Katomi, mu gihe abandi amagana bafatiwe mu nyubako eshatu bituranye za “apartments”.
Abandi bantu bafatiwe mu nkengero za Kampala zirimo Naguru na Kansanga, bituma umubare w’abafunzwe urenga 1.000 nk’uko bitangazwa na Chimpreports.
