Impunzi 40 zo muri Congo zahungiye muri Uganda zimaze guhitanwa n’icyorezo cya Kolera ( Cholera) cyageze mu nkambi izi mpunzi zicumbitsemo.
Nk’uko byatangajwe n’umuryango utabara imbabare( Croix Rouge) muri Uganda, ngo iki cyorezo cy’ibasiye impunzi zavuye Congo zihunze imirwano ya buri munsi yo mu Burasirazuba bwa Congo ishingiye ku moko ndetse n’ingabo zihanganye n’imitwe yitwaje intwaro.
Croix Rouge ivuga ko iki cyorezo cyatangiye muri Gashyantare cyamaze kurenga ubushobozi bw’ibitaro, bituma gikwirakwira mu nkambi yose. Mu itangazo basohoye rigira riti “’Isuku idahagije ndetse no kubura amazi meza byatumye haza icyorezo cya Kolera biviramo abarenga 40 kuhasiga ubuzima mu nkambi ya Kyangwali na Kyaka mu Burengerazuba bwa Uganda’’.
Croix Rouge ikomeza ivuga ko hakiri ibibazo byinshi bijyanye na Kolera bikenewe gukemurwa birimo gushaka amazi meza n’ibindi. Abanye Congo barenga ibihumbi 70,000 bahungiye muri Uganda kuva uyu mwaka watangira.
Bamwe bagera muri Uganda mu buzima bubi, ntabyo kurya, nta mazi meza, nta myambaro ugasanga ngo bahuye n’indwara zitandukanye zirimo malariya, kolera, diyare,,. Croix Rouge ikaba ifite ubwoba ko icyorezo gishobora gukomeza kwiyongera.
Nkuko tubikesha The East African, Abanyecongo bahunga imirwano ihora mu ntara ya Ituri ndetse n’ubwicanyi bubera mu ntara ya Kivu y’Amajyaruguru. Bakaba bahunga banyuze mu kiyaga cya Albert.
Kanda kuri SUBSCRIBE ujye ubona ibiganiro n’indirimbo bishya
Nkurunziza Viateur Bwiza. com
