Uganda: RNC iravugwaho gushinga ikigo kigisha abakada bayo ingengabitekerezo no gusesengura

Mu gukurikirana ingamba zayo zo kurwanya ubutegetsi bw’u Rwanda, ishyaka RNC rya Kayumba Nyamwasa riravugwaho gushinga i Bugolobi muri Kampala, ikigo kizajya kigisha abakada baryo ingengabitekerezo yaryo cyashinzwe mu nyungu z’urubyiruko rw’iri shyaka.

Ikinyamakuru Virunga Post kivuga ko iyi ntambwe nshya yatewe nyuma kunanirwa gushinga ibirindiro mu misozi miremire ya Minembwe muri Kivu y’Amajyepfo.

Iki kinyamakuru cyerekana ko ibigo by’imyitozo byshinzwe na RNC muri iyi misozi miremire, bigoye kuhagera, byashenywe n’ingufu zitazwi abatozwaga n’ababatozaga bakagerageza guhungira muri Uganda bagatabwa muri yombi n’ingabo za Congo bagasubizwa mu Rwanda.

Iki kigo kizajya kigisha abakada ba RNC biravugwa ko cyashinzwe mu gace ka Bugolobi, muri Mpanga ya kampala ku muhanda wa 21, kikaba kirinzwe bikomeye n’abakorera urwego rw’ubutasi bwa gisirikare (CMI) bambaye gipolisi.

Biravugwa ko icyiciro cya 12 kimaze gusoza amasomo, kuri ubu hari kwigishwa icyiciro cya 13, aho abigamo bagenda bavanwa mu nkambi z’impunzi no mu bice bituyemo Abanyarwanda n’Abagande bafite inkomoko mu Rwanda nka Hoima, Mubende, Kiboga, Kakumiro, Nakivale n’ahandi.

Usibye ingengabitekerezo yigishirizwa muri iki kigo, ngo hongewemo n’amasomo ya SWOT yo gusesengura, imbaraga, intege nke, amahirwe ndetse n’imbogamizi zihari hataramenyekana impamvu impamvu zayo.