Umuvugizi w’ishyaka FDC, Ibrahim Ssemujju Nganda, mu gitondo cyo kuri uyu wa Kabiri yatawe muri yombi ajyanwa gufungirwa kuri Station ya polisi ya Najjanakumbi mu Karere ka Wakiso mu gihugu cya Uganda.
Bwana Ssemujju yafashwe n’abapolisi n’abasirikare ubwo yari mu nzira agana ku biro by’ishyaka FDC bivugwa ko byari byafunzwe n’igipolisi kitemerera umuntu wese kubikandagiraho.
Inzira zigana ku biro bya FDC zafunzwe
Urubuga rwa KFM ruravuga ko uyu yafashwe mu gihe hategerejwe ko umukandida w’iri shyaka, Patrick Amuriat, yemezwa na Komisiyo y’amatora nk’uwemerewe kwiyamamaza cyangwa agahakanirwa.
Mu gihe iyi komisiyo yikomye imyigaragambyo iyo ari yo yose, Amuriat ngo yari afite gahunda yo guherekezwa n’abayoboke be kuva Najjanankumbi yerekeza Kyambogo, ahari gutangarizwa abakandida bemerewe kuziyamamaza kuva kuri uyu wa Mbere.
Igipolisi kikaba cyatangaje ko kiteguye gufata no gushinja ibyaha umuntu wese ugerageza kunyuranya n’amabwiriza yashyizweho.
Amakuru ava muri iki gihugu kandi nk’uko bitangazwa na Spyreports aravuga ko igipolisi kiri guta muri yombi umuntu wese wambaye ingofero itukura wegera ibiro bya FDC.
