Nta gihe gishize Real Madrid yandagaje Liverpool iyisanze iwayo ikayihatsindira ibitego 5; ibyatumye abantu basubiza amaso inyuma bakareba intsinzwi zikomeye amakipe akomeye i Burayi yaba yaragize cyane cyane mu mikino ya UEFA Champions.
Muri ruhago ikipe ishobora gutsindwa ibitego byinshi atari uko isanzwe ari ikipe mbi, ahubwo ari umukino wayibereye mubi hakibazwa niba ari iyo kipe abantu bari basanzwe bazi.
Akenshi bene izi ntsinzwi zo kwihanangiriza zirukanisha abatoza, abakinnyi ndetse zigakura n’abayobozi mu myanya yabo ari na yo mpamvu zikuza ubucyeba hagati y’amakipe.
Muri rusange, menshi mu makipe akomeye usanga agenda agera mu twebo na yo yagerewe.
Uyu munsi BWIZA yabateguriye urutonde rw’amakipe yo muri za shampiyona 5 zikomeye i Burayi yigeze anyagirwa imvura y’ibitego.
Real Madrid
Iyi kipe ikomoka mu murwa mukuru wa Espagne ni yo kipe ifatwa nk’iya mbere ku Isi kubera ibikombe byinshi yatwaye birimo na UEFA Champions League 14. Iyi kipe yaraye igarukanye Liverpool irayitsinda irayandagaza. Gusa benshi ntibibukaga ko Liverpool yigeze kwinjiza ibitego 4-0 mu izamu rya Real Madrid muri 2008/2009, ikaba ari na yo ntsizwi iremereye Real Madrid yagize muri Champions League.
Real Madrid kandi yigeze inyagirwa na FC Bayern Munich ibitego 9-1 mu mukino wa gishuti wabaye muri Kanama 1980 ikaba ari na yo ntsizwi iremereye Real mu mateka yayo. Byongeye kandi, Real yanigeze inyagirwa na Espanol Barcelona ibitego 8-1 mu w’1930 muri La Liga.
FC Barcelona
Iyo bigeze ku kwandagazwa mu kibuga, abantu bose bibukira itariki ya 14 Kanama 2020, ubwo FC Bayern Munich yayisuzuguraga ikayitsinda ibitego 8-2 byose mu mikino ya UEFA Champions league.
Byari agahinda kubona abakinnyi bakuru nka Lionel Messi, Sergio Busquets, LuĂs Suarez na Gerard Pique babuze aho kwifata ikipe yabahejeje umwuka nta cyo babikoraho.
Iyi kipe y’i Catalonia kandi yigeze itsindwa na mucyeba wayo Real Madrid ibitego 11-1 mu gikombe cya Copa GeneralĂs mu w’1943. La Braugrana kandi yatsinzwe na FC Sevilla muri La Liga ibitego 12-1 mu 1931.
FC Bayern Munich
‘The Bavarians’ ni yo kigugu mu Budage bwose dore ko ifite ibikombe bitabarika birimo na 6 bya UEFA Champions.
Iyi kipe na yo Real Madrid yigeze iyigerera mu kebo igereramo izindi, ubwo hari mu mikino ya UEFA Champions League yo muri 2013/2014 iyitsindira mu rugo Allianz Arena ibitego 4-0, ibyatsinzwe na Cristiano Ronaldo na Sergio Ramos.
Mu 1976 kandi Bayern Munich yanyagiwe bikomeye na FC Schalke 04 ibitego 7-0.
Liverpool
Ijoro ryacyeye Real Madrid yatsinzemo Liverpool 5-2 ryiyongereye ku rutonde rw’amajoro yanze gutana abafana ba Liverpool batazibagirwa by’umwihariko ku kibuga cy’amateka Anfield.
Izindi ntsinzwi zikomeye za Liverpool ni iy’ibitego 2–9 imbere ya Newcastle United ku ya 1 Gashyantare 1934. Liverpool yanatsinzwe na Stoke City ibitego 6-1 tariki ya 24 Gicurasi 2015. Yanatsinzwe kandi na Manchester City ibitego 5-0 muri 2017. Liverpool yongeye gusuzugurwa na Aston Villa iyinyabika ibitego 7-2 tariki 4 Ukwakira 2020.
Juventus
Tariki ya 24 Ugushyingo 2021, Chelsea yihanangirije Juventus de Torino ku kibuga Stanford Bridge, maze iyitsinda ibitego 4-0, iyi ikaba ari na yo ntsizwi iremereye Juventus yagize mu mikino ya UEFA Champions League.
Juventus yakunze kugera ku mikino ya nyuma ya UEFA Champions League ariko ntiyegukane, harimo n’uwabereye i Cardiff muri 2017 maze itsindwa na Real Madrid ibitego 4-1 nyuma y’imyaka ibiri itsinzwe na FC Barcelona na none kuri finale.
Juventus kandi mu 1911/1912 yanyagiwe na mucyeba wayo AC Milan ibitego 8-1 ku kibuga Sani Siro.
Paris Saint Germain
Tariki ya 8 Werurwe 2017, Isi y’umupira ntizibagirwa ibyabere kuri Stade Camp Nou ubwo FC Barcelona yishyuraga Paris Saint Germain ibitego 5 ikarenzaho n’igituma ikomeza, ubwo hari mu mikino ya UEFA Champions League itsindwa 6-1.
PSG kandi yigeze itsindwa na Juventus ibitego 6-1 ku mukino wa UEFA Super Cup yo mu w’1997.
Tariki ya 1 Nzeri 1971, nibwo Paris Saint Germain yatsinzwe bikomeye na Nantes muri shampiyona yo mu Bufaransa Ligue 1, ubwo yari yatsinzwe ibitego 6-0.
