Umucamanza Matthew Brann wo muri Leta ya Pennsylvania yateye utwatsi ibirego by’abashyigikiye Donald Trump bifuza ko amamiliyoni y’amajwi y’abatoye bakoresheje iposita yagirwa impfabusa, ashimangira ko ibi birego nta shingiro bifite.
Iki cyemezo cy’urukiko kikaba cyahaye uburenganzira Leta ya Pennsylvania bwo kuzemeza intsinzi ya Joe Biden mu cyumweru gitaha, aho arusha Trump amajwi 80,000.
Umucamanza Brann yavuze ko abashinzwe amatora ku ruhande rwa Trump bari bagerageje “kwaka uburenganzira bwo gutora abantu hafi imiliyoni zirindwi zose”.
Iki ni igihombo gikomeye kuri Donald Trump mu rugamba akomeje rwo kugerageza guhindura ibyavuye mu matora yabaye ku itariki 03 Ugushyingo yatsinzwemo na Joe Biden bari bahanganye wo mu ishyaka ry’Abademokarate.
Kuwa Gatanu ushize nk’uko tubikesha BBC, Leta ya Georgia nayo yari yakuriye inzira ku murima Perezida Trump yemeza intsinzi ya Joe Biden nyuma yo kongera kubara hakoreshejwe intoki.
Muri Wisconsin, abashinzwe amatora bashinja indorerezi za Trump kuba zaragerageje gutinza ibikorwa byo kubarura amajwi kugirango igihe kibe kigenda. Impamvu ngo nuko bateganya ko ibikorwa byo kubarura bushya byarenza itariki 01 mu kwezi gutaha, itariki ntarengwa Wisconsin igomba kwemerezaho ibyavuye mu matora.
Muri iyi leta naho Joe Biden akaba yararushije Trump amajwi 20,000.
Impamvu kwemeza ibyavuye mu matora ari ngombwa
Ubusanzwe ngo iyo Abanyamerika batora umukuru w’igihugu batora ku rwego rw’intara (Leta), ntibatora ku rwego rw’igihugu. Kubw’ibyo batora intumwa z’itora zihagararira lntara (leta), izi ntumwa akaba ari zo zitora umukuru w’igihugu.
Mu gutora rero, izi ntumwa zisabwa gutora uwo abazitoye mu ntara runaka bashaka, nk’urugero muri Michigan, intumwa zose zigomba gutora Joe Biden kubera ko ari we watsindiye iyi leta.
