Umufaransa Dujardin Sandy ukinira ikipe ya Total Energie y’iwabo, ni we wegukanye agace ka kabiri k’isiganwa ry’amagare rizenguruka u Rwanda rya 2022 kakinwe kuri uyu wa Mbere.
Ni agace kavaga mu mujyi wa Kigali kerekeza i Rwamagana, mbere y’uko abasiganwa bahindukira nanone bagasoreza mu mujyi wa Kigali babanje kuzenguruka bimwe mu bice byawo.
Rwari urugendo rw’ibirometero 148 na metero 300.
Dujardin Sandy yegukanye aka gace akoresheje amasaha atatu, iminota 28 n’amasegonda 25; anganya ibihe na mwene wabo Laurance Axel we ukinira B&B Hotels yo mu Bufaransa.
Umunyarwanda waje hafi ni Uwihirwe Byiza Renus wa Team Rwanda wanganyije ibihe na Sandy.
Umufasha Geniel Alexandre wa Total Energie ni we wahise afata umwambaro w’umuhondo, arusha amasegonda atandatu Restrepo Valencia Jhonatan wa Drone Hopper_Androni Gio.
Umunyarwanda uri hafi ku rutonde rusange ni Renus uri ku mwanya wa 22 arushwa n’uwa mbere amasegonda 20.
