Tatiana Akhmedov, wahoze ari umugore w’umuherwe w’Umurusiya, Farkhad Akhmedov, arishyuza akayabo ka miliyoni 450£ (Amapound yo mu Bwongereza) nyuma yo gutana n’umugabo we, ndetse akaba anakurikiranye umuhungu we mu mategeko amwishyuza hafi miliyoni 70.
Tatiana Akhmedova w’imyaka 48 avuga ko uwahoze ari umugabo we, umucuruzi Farkhad Akhmedov w’imyaka 65 y’amavuko, afite imitungo ihishe kandi agashinja umuhungu wabo w’imyaka 27, Temur Akhmedov, kuba akorera mu kwaha kwa se.
Uru ni urubanza rwa gatanya rushobora kurangira umtungo ubarirwa muri miliyari wa Farkhad awugabanamo kabiri n’umugore we. Ni urubanza kandi rusa nk’urutarangira vuba nubwo kenshi mu manza nk’izi zirimo abaherwe bo mu Burusiya, iteka ibyifuzo by’abagore ari byo byubahirizwa nk’uko tubikesha The Times.
Madamu Akhmedova ukomoka mu Burusiya ariko akaba atuye i Londres, avuga ko umuhungu we yafashije se guhisha umutungo kandi amurimo miliyoni hafi 70 z’Ama-Pound.
Abunganira Akhmedova mu mategeko babwiye umucamanza ukurikirana ayo makimbirane ko umuhungu we, Temur Akhmedov ari umuntu “w’inkundamugayo bidasanzwe”.
Temur Akhmedov yasubije ko ibyo nyina amushinja bitakwizerwa ndetse asaba ko ibyo aregwa byateshwa agaciro.
Akhmedova yahawe n’umucamanza w’i Londres umugabane wa 41.5% by’umutungo w’uwahoze ari umugabo we w’asaga miliyari 1 y’Ama-Pound mu mpera za 2016.
Umucamanza Haddon-Cave yavuze ko agomba kwakira miliyoni 453 z’Ama-Pound, ariko abacamanza bakaba bumva ko kugeza ubu yakiriye hafi miliyoni 5 zonyine kandi Farkhad Akhmedov nta bushake afite bwo kwishyura.
Umuherwe Akhmedov avuga ko kubera ko we n’uwahoze ari umugore we atari Abongereza, kandi batashyingiraniwe mu Bwongereza, umucamanza wo mu Bwongereza atari akwiye gufata iki cyemezo.
Tatiana n’umugabo we Farkhad
Nubwo atemera iki cyemezo ariko, Farkhad yemera guha uwahoze ari umugore we umutungo uherereye muri Surrey na tableaux zakozwe na Andy Warhol na Mark Rothko. Ibi ariko Tatiana yumva bidahagije.
Uyu mugore mu gihe yatsinda umuhungu we, ufite n’ubwenegihugu bw’u Bwongereza, akaba ashobora kwigarurira inzu ye afite i London ifite agaciro ka Miliyoni 43 z’Amayero ndetse na villa iherereye ahitwa Saint-Jean-Cap-Ferrat ifite agaciro kabarirwa muri miliyoni 15 z’Amayero.
Naho umugabo we, ngo yatangarije umuhungu we ko yakwemera agatwika amafaranga yose atunze aho kugirango ayagabane na Tatiana.
