Rwiyemezamirimo mu ikoranabuhanga Elon Musk ari mu nzira yo kuba umuherwe wa mbere utunze Tiliyari y’Amadorari ku Isi mu 2027, nk’uko ikigo cy’uburezi Informa Connect Academy kibitangaza.
Ibi byatangajwe ku wa Gatanu bishingiye ku kigereranyo cy’ukuntu ubukungu bwa Musk bugenda buzamuka cyane buri mwaka, aho buzamuka ku rugero rwa 109.88%.
Nk’uko byatangajwe na Bloomberg Billionaires Index, ngo nyiri X (yahoze ari Twitter) ni we muntu ukize cyane ku Isi kugeza ubu n’umutungo wa miliyari 237 z’amadolari.
Musk yashinze ibigo bitandatu, birimo uruganda rukora imodoka zikoresha amashanyarazi, Tesla, hamwe n’uruganda rukora ibyogajuru SpaceX. Tesla ifite imari shingiro ya Miliyari 669.28 z’Amadolari, biteganijwe ko umwaka utaha izagera kuri Tiriyari y’Amadorari. Musk yaguze Twitter mu 2022, ayita X kandi asezeranya kugabanya kugenzura no gukorera mu mucyo.
Abandi ba miliyarideri benshi bashobora kuzinjira muri “Club of Trillionaires” mu minsi ya vuba ni umuherwe wa mbere mu Buhinde, Gautam Adani, Umuyobozi mukuru wa Nvidia, Jensen Huang, na Prajogo Pangestu wo muri Indonesia. Biteganijwe ko bose uko ari batatu bazaba batunze Tiliyari y’Amadolari mu 2028, nk’uko Informa Connect Academy yabihanuye. Umunyemari w’Umufaransa, Bernard Arnault, umuyobozi wa sosiyete ya mbere nini ku Isi icuruza ibikoresho bihenze ya LVMH, birashoboka ko azagera kuri urwo rwego mu 2030.
Musk yagaragaye bwa mbere ku rutonde rw’abatunze Miliyari y’Amadolari rwa Forbes mu 2012 afite umutungo wa Miliyari 2 z’Amadolari. Mu 2021, yabaye umuntu ukize cyane ku Isi, akuye Jeff Bezos washinze Amazone kuri uwo mwanya. Musk yatakaje iyi status mu Kuboza 2022 asimburwa na Arnault igihe imigabane ya Tesla yagabanukaga, ariko agaruka ku mwanya wa mbere ku rutonde nyuma y’amezi atandatu.
