Umunya Serbia, Novak Djokovic ufatwa nk’umukinnyi wa mbere ku Isi ukina umukino wa Tennis, yatangaje ko yamaze kwandura icyorezo cya Covid-19.
Ni amakuru uyu mugabo yahishuye nyuma y’uko abarimo Grigor Dimitrov, Borna Coric na Viktor Troicki na bo bakina Tennis batangaje ko banduye kiriya cyorezo, nyuma yo kwitabira irushanwa ryitwa Adria Tour competition ryateguwe na Novak Djokovic.
Ku bwa Andy Murray, Umwongereza wamamaye mu mukino wa Tennis, kuba Djokovic yaranduye kiriya cyorezo ari isomo rikomeye ku bakinnyi bakina uwo mukino.
Mu itangazo Djokovic yasohoye rigaragara ku rubuga rwe rwa Internet, yahishuye ko we n’umugore we Jelena banduye Covid-19, nyuma yo kugera i Belgrade bavuye mu mujyi wa Zadar wagombaga kuberamo umukino wa nyuma wa ririya rushanwa, bikarangira utabaye kubera ko Dimitrov bari bamusanzemo Covid-19.
Djokovic yagize ati”Niseguye cyane kuri wese kubera uburwayi. Ndizera ko bitazagora ubuzima bw’uwo ari we wese kandi ko buri umwe wese azamera neza.”
Yunzemo ati”Tukigera i Belgrade twagiye kwipimisha. Ibisubizo byagaragaje ko nanduye kimwe na Jilena, mu gihe ibisubizo by’abana bacu byagaragaje ko ari bazima.”
Kuva muri Gashyantare uyu mwaka nta rushanwa Mpuzamahanga rya Tennis ryigeze ribaho ku Isi kubera icyorezo cya Covid-19, irushanwa rya Adria Djokovic yateguye rikaba rimwe mu marushanwa ya mbere yateguwe kuva imikino yasubikwa kubera icyo cyorezo.
Umukino wa mbere w’iri rushanwa witabiriwe n’abafana 4000, nyuma yawo abakinnyi baryitabiriye bafororwa babyina mu kabyiniro k’i Belgrade.
Ni nyuma y’uko ku wa gatandatu w’icyumweru gishize Dimitrov wo muri Bulgaria yari yakinnye na Coric ya Croatia mu mukino wo kwishyura wabereye mu i Zadar muri Croatia.
Biteganyijwe ko imikino yo ku rwego rw’Ishyirahamwe ry’umukino wa Tennis ku Isi izatangira ku wa 14 Kanama, mu gihe irushanwa rya US Open riri mu yakomeye muri uyu mukino rizatangira ku wa 31 z’uko kwezi.
