Umukobwa wo muri Kenya witwa Faith Chepkemoi yatunguye benshi ku mbuga nkoranyambaga nyuma yo kwemera ko azashyingiranwa n’umukunzi we Victor Kibiwott, uba i Dubai, wabimusabiye kuri telefoni.
Ibi byabaye mu birori byateguwe mu buryo bw’amayobera mu gace ka Kericho muri Kenya, aho Faith yari yatunguriwe n’umukunzi we bari bamaze imyaka itanu bakundana bari mu bihugu bitandukanye.
Amashusho y’ibi birori yashyizwe ku mbuga nkoranyambaga agaragaza Faith yambaye ikanzu itukura n’inkweto z’umukara, bamuziritse mu maso kugira ngo atamenya ibigiye kuba.
Bamugejeje aho ibirori byari byateguriwe, bamukuraho igitambaro, asanga hari ahateguwe n’imitako y’amabara atukura, imipira n’abantu bafashe ibyapa byanditseho amagambo agira ati: “Twazashyingiranwa?”
Mu gihe Faith yari akiri mu rujijo, yahujwe na Victor binyuze mu kiganiro cya videwo, aho yamugaragarije icyifuzo cyo kumubera umugore.
Victor yari i Dubai, mu gihe Faith yari muri Kenya. Umusore yari yateguye ko mu birori haboneka agasanduku k’impeta n’ifoto ye kugira ngo umukunzi we yumve ko ari kumwe na we nubwo bari kure.
Faith yarenzwe n’ibyishimo, atangira kurira yumvise Victor amusaba ko bazabana. Nyuma yo guhabwa indabo, yafashe impeta ayishyira ku rutoki rwe.
Mu mashusho yashyizwe hanze, Faith yumvikana yemera ubwo busabe agira ati: “Yego, ndabyemeye.”
Yahise ahobera ifoto y’umukunzi we, mu gihe inshuti n’abagize umuryango bari bari kwishimira iyo ntambwe.