Igisirikare cya Somalia (SNA) cyatangaje ko cyivuganye umwe mu bakomanda bakuru b’imutwe wa Al-Shabaab mu bikorwa bya gisirikare byabereye mu majyepfo y’igihugu.
SNA yemeje ariya makuru ku Cyumweru cy’itariki ya 04 Nyakanga.
Iki gisirikare kibinyujije kuri Radiyo yacyo, cyatangaje ko umukomanda wa Al-Shabaab cyivuganye ari Mohamed Abdi Suubiye wari uzwi nka Toosoow.
Uyu ngo yishwe n’ingabo zidasanzwe zo mu mutwe wa Gorgor, mu ijoro ryo ku wa Gatandatu w’icyumweru gushize agerageza guhangana na zo.
Ingabo zamutsinze mu mudugudu witwa Darussalam wo mu mujyi wa Aadan Yabaal uherereye mu gace ka Middle Shabelle.
Uretse uriya mukomanda, iriya mirwano yanaguyemo abandi barwanyi ba Al-Shabaab nk’uko amakuru abitangaza.
Umutwe wa Al-Shabaab ushinjwa kuba inyuma y’ibitero bitandukanye byagiye bigabwa ku basivile no ku nzego zishinzwe umutekano, birimo n’ibyagiye bigabwa ku birindiro by’ingabo za Somalia biherereye mu majyepfo y’icyo gihugu.
Ni ibitero byatwaye ubuzima bw’ababarirwa mu bihumbi.
Cyakora cyo mu minsi yashize ingabo za Somalia zatangije ibitero simusiga byo guhiga Al-Shabaab mu bice by’ibyaro byo mu majyepfo no hagati mu gihugu, abarwanyi b’uriya mutwe bihishemo.
Kurikira ibiganiro n’amavidewo binyura kuri Bwiza TV->https://www.youtube.com/channel/UC_Wx4Sy2IawVLtp5-QMRhnQ]
