Umutoza w’Amavubi yatangaje amagambo akomeye mbere yo guhura na Sénégal ya Mané

Umutoza w’Ikipe y’Igihugu ‘Amavubi’, Carlos Alòs Ferrer, yatangaje ko abizi neza ko Sénégal ari ikipe ikomeye; gusa nk’Amavubi bakaba biteguye guhatana na yo.

Ku mugoroba wo kuri uyu wa Kabiri ni bwo Amavubi y’u Rwanda yesurana na Les Lions de la Téranga ya Sénégal, mu mukino wa kabiri wo mu tsinda L.

Barahurira kuri Stade ya Abdoulaye Wade Saa tatu z’i Kigali bashaka itike y’Igikombe cya Afurika kizabera muri Côte d’Ivoire.

U Rwanda mu mukino wa mbere w’itsinda rwari rwaguye miswi na Mozambique igitego 1-1, Sénégal ibifashijwemo na Sadio Mané itsinda Bénin igitego 1-1.

Umutoza Carlos mu kiganiro n’abanyamakuru cyabaye kuri uyu wa Mbere, yabajijwe uko yiteguye Sénégal na Mané avuga ko Amavubi yiteguye guhangana na bo.

Ati: “Turabizi ko Sénégal ari ikipe nkuru ifite abakinnyi bakomeye, ariko mu mukino tuzaba turi 11 kuri 11 hapana Sadio Mané n’u Rwanda. Twiteguye rero guhatana na bo no guharanira intsinzi.”

Kapiteni w’Amavubi, Meddie Kagere na we yunzemo ko Amavubi agomba gukina umukino wo ku rwego rwo hejuru kugira ngo ahangane n’ikipe nk’iriya ikomeye ndetse akanabyaza umusaruro uburyo ari bubone kugira ngo abashe kuwutsinda.

Sénégal ni yo iyoboye itsinda n’amanota atatu igakurikirwa n’Amavubi afite rimwe anganya na Mozambique.