Prof. Dr. Padiri Nyumbayire Faustin wari Umuyobozi Wungirije wa Kaminuza y’Ikoranabuhanga n’Ubumenyi (UTAB) yirukanwe kuri uwo mwanya. Mu ibaruwa yo kuwa 28 Ukwakira yandikiwe Mgr. Servianus Nzakamwita, uhagarariye iyi kaminuza mu rwego rw’amategeko, Bwiza.com ifitiye kopi, ivuga ko Prof. Nyumbayire yasezerwe ku kazi ku bwo kutumvikana n’umwungirije ushinzwe imari, iterambere n’imiyoborere, Niyibizi Mbabazi Justine. Ni icyemezo cyafashwe mu nama yo kuwa 26 Ukwakira nyuma yo gusuzumwa n’abagize inama y’ubutegetsi ya UTAB 14. Iyi baruwa ivuga ko icyemezo cy’uko aba bayobozi babiri ba UTAB birukanwe bazakigezweho na Mgr. Nzakamwita nk’uko ibaruwa yashyizweho umukona na Perezida w’Inama y’Ubutegetsi ya UTAB, Dr Alfred Ndahiro. Dr Ndahiro nta byinshi yatangaje ku bikubiye mu cyiswe umwuka mubi hagati ya Prof. Nyumbayire na Mbabazi Justine. Yasabye Musenyeri Nzakamwita kugena uko UTAB yaba iyobowe mu gihe hataraboneka abasimbura b’aba bayobozi babiri birukanwe. Mu yindi baruwa Bwiza.com ifitiye kopi, Musenyeri wa Diyosezi ya Byumba, Servianus Nzakamwita yemeje iyirukanwa rya Prof. Nyumbayire amusaba ko mu kwezi kumwe yaba yamaze kwitegura guhabwa ubundi butumwa. Yavuze ko Nyumbayire yananiwe gukemura byinshi mu bibazo iyi kaminuza ifite kandi bimwe abifitemo uruhare runini. Ati ” Nguhaye ukwezi kumwe. Ukimara kubona iyi baruwa, wihutire gushyira ku murongo ibyo wari ushinzwe (remise), ukazabishyikiriza uwo nzakumenyesha mu minsi micye.” Musenyeri Nzakamwita kandi yashimiye Nyumbayire imirimo yakoreye Kaminuza ya UTAB.
Banzuye ko “aba bayobozi bombi batumvikana basezererwa ku mirimo yabo.”
Mbabazi Justine na we yirukanwe/ Ifoto: interineti
Prof. Dr. Padiri Nyumbayire Faustin/ Ifoto: interineti
