Bamwe mu baturage b'u Bwami bwa Busoga barashinja Umwamikazi (Inhebantu) Mutesi Jovia kutita ku mugabo we Umwami (Isebhantu) Kyabazinga William Wilberforce Kadhumbula Gabula Nadiope IV, bakurikije uko baherutse kumubona bakabona asa n'ukora mu kabari.
Umwe mu bakoresha Facebook yibajije impamvu Kyabazinga Gabula asigaye agaragara adasa neza kandi mbere yo gushyingiranwa n'Umwamikazi Mutesi yari ameze neza.
Uyu mugore Mu Lusoga ati " Inhebantu Jovia Mutesi kuki Umwami adasa neza. Ugiye kutubwira ko urushako rugiye kutwicira Umwami? Iyi videwo ni iyawe, ni gute Umwami agira umusatsi umeze kuriya? amatama? Ubwana busa kuriya? Ni gute yaza mu birori bye asa kuriya nk'ukora mu kabari?"
Uyu mugore yibukije Umwamikazi Mutesi ko we asa neza bigaragara ko Umwami Gabula amwitaho. Yamwibukije ko ari inshingano ze kwita ku mwami. Arifuza ibisobanuro kuri iyi ngingo.
Abenshi mu batanze ibitekerezo kuri iyi ngingo bavuze ko bigaragara ko Umwami Gabula Nadiope IV agaragara nk'unaniwe muri iyi minsi.
Ibi ariko birahurirana n'uko n'ubusanzwe Abasoga bakemanze niba Mutesi yaba ari uwo mu bwoko bwabo, bakamwita Umunyarwanda bavuga ko nta Musoga witwa Mutesi.
Umwamikazi Jovia Mutesi n'Umwami Gabula Nadiope IV, bashyingiranywe ku wa 18 Ugushyingo 2023.
Ubukwe bwabereye kuri Christ’s Cathedral i Bugembe, mu Mujyi wa Jinja, muri Uganda, buyoborwa na Archbishop Stephen Kaziimba Mugalu wo muri Church of Uganda.
Ubu bukwe bwari amateka kuko bwabaye ubukwe bwa mbere bw’umwami wa Busoga bukorewe muri katederali, ndetse bwari n’ubukwe bwa mbere bw’ibwami muri Busoga kuva mu 1956.