Urugendo rwa APR FC muri CAF Champions league rurangiriye i Nairobi

Ikipe ya APR FC yasezerewe muri CAF Champions league y’uyu mwaka, nyuma yo gutsindindwa na Gor Mahia yo muri Kenya ku giteranyo cy’ibitego 4-3.

Iyi kipe y’ingabo z’igihugu yari yaratsinze ibitego 2-1 mu mukino ubanza wabereye i Kigali, gusa ntibyari bihagije kugira ngo irenge ijonjora ry’ibanze kuko mu mukino wo kwishyura wabereye kuri Nyayo National Stadium yatsinzwe ibitego 3-1.

Intego y’iyi kipe kwari ukugera mu matsinda ya CAF Champions league, gusa birangiye itabigezeho.

Nsanzimfura Keddy wari winjiye mu kibuga asimbura Manishimwe Djabel yari yashoboye kwishyurira APR FC igitego yari yatsinzwe na Samuel Onyango ku munota wa 18 w’umukino, gusa icyo gitego cyo ku munota wa 76 w’umukino gikurikirwa n’ibindi bibiri byihuse bya Gor Mahia.

Ni ibitego bya Sydney Ochieng na Nicholas Kipkirui, byose byaturutse ku mipira ya koruneri mu minota itanu y’inyongera.

Ku munota wa 12 w’umukino APR FC yari yabonye Penaliti yashoboraga gutuma yitwara neza muri uriya mukino, gusa iza guhushwa na rutahizamu Jacques Tuyisenge.