Urukiko rw’umuryango w’Ibihugu bya Afurika y’Iburasirazuba (EAC J-Court), rwatesheje agaciro ubujurire bwa Leta y’u Burundi bw’uko umuyobozi w’inteko y’uyu muryango, Martin Ngoga, yatowe mu buryo budakurikije amategeko.
Mu mwaka ushize, Leta y’u Burundi yari yatanze ikirego muri ruriya rukiko, ivuga ko mu Kuboza kwa 2017, Umunyarwanda Martin Ngoga yatorewe kuyobora inteko ya EALA, nyamara abahagarariye ibihugu binyamuryango bya Tanzania n’u Burundi badahari.
Muri Nyakanga 2019, uru Rukiko rwanzuye ko urega (u Burundi) nta bimenyetso bifatika yatanze byashingirwaho bihamya ko umuyobozi w’inteko ya EAC yatowe binyuranyije n’amategeko agenga uwo muryango, rwanzura ko ikirego cy’urega nta shingiro gifite.
Mu iburanisha ryari ryabaye muri Werurwe 2019, Nestor Kayobera wari uhagarariye u Burundi mu rubanza, yavuze ko amatora yabaye intumwa z’u Burundi na Tanzania muri iyi Nteko zidahari.
Yavuze ko iryo tora ryanyuranyije n’amahame agenga umubare w’abatora uwo muyobozi, ndetse n’amahame agenga uyu muryango w’ibihugu, asabaga ko amatora asubirwamo.
Dr Anthony Kafumbe wari uhagarariye umunyamabanga w’umuryango wa EAC (abarezwe), we yabwiye urukiko ko “amategeko agena ko abagize inteko bose badategetswe gutora”, bityo ko abahagarariye u Burundi na Tanzania bari bafite uburenganzira bwo kudatora.
U Burundi nyuma yo gutsindwa urwo rubanza bwarajuriye.
Mu butumwa urukiko rwa EAC rwanyujije ku rubuga rwarwo rwa Twitter kuri uyu wa kane, rwavuze ko rwatesheje agaciro ubujurire bw’u Burundi nyuma y’uko abacamanza bane kuri umwe bemeje ko nta shingiro bufite.
Ubutumwa burabira buti: “Urukiko rwanze ubujurire bwa guverinoma y’u Burundi bwamagana icyemezo cy’ishami rya mbere ryerekeye itorwa rya Perezida wa EALA wa 4. Ubujurire bwakuweho n’ikiguzi cy’uregwa. Uru ni rwo rubanza rwaciwe ku bwiganze bw’abacamanza 4 kuri 1.”
Urukiko rwavuze ko umucamanza wemeje ishingiro ry’ubujurire bw’u Burundi azatanga impamvu yashingiyeho ku munsi w’ejo.
Mangingo aya ntiharamenyekana icyo Leta y’u Burundi ikurikizaho nyuma y’uko ubujurire bwayo buteshejwe agaciro.
Martin Ngoga yatorewe kuyobora inteko ya EALA mu kwezi kwa 12 mu mwaka wa 2017. Ni umwanya agomba kumaraho imyaka itanu mbere yo kuwusimburwaho n’undi muntu wo mu bihugu binyamuryango bya EAC.
