Urukingo: KNC na Mutabaruka bashimangiriwe muri studio za televiziyo

Abanyamakuru babiri ba TV1, Kakoza Nkuriza Charles uzwi nka KNC Imfurayiwacu na Mutabaruka Angelbert bahawe urukingo rwa Covid-19 rushimangira bari muri studio ya televiziyo, mu rwego rwo gutinyura abandi barimo abahunze banga kubahiriza iyi gahunda.

KNC na Mutabaruka bakoze iki gikorwa kuri uyu wa 3 Gashyantare 2022 ubwo bari mu kiganiro Rirarashe basanzwe bakora buri mu gitondo, cyari cyatumiwemo n’umuyobozi w’ikigo nderabuzima cya Remera.

Baganiriye ku ngamba zo gukumira Covid-19 bw’umwihariko gahunda y’ikingira, basaba uyu muganga wari witwaje inkingo zo mu bwoko bwa Moderna ko yabatera urukingo rushimangira.

Agiye gushimangirwa, KNC yagize ati: “Nizere ko mwese murimo kureba. Urukingo rushimangira ntacyo rutwaye!” Nyuma y’igikorwa, ati: “Murabona yuko Titulaire aranshimangiye. None se hari ubona mpebebye? Abareba televiziyo muraza kubona banshimangira, namwe rero mbagira inama yo kwishimangiza. Ubu ngubu bya bindi byo kuvuga ngo umubiri wanjye urimo abanyerondo nta basirikare bakirimo.”

Mutabaruka ashingiye ku kuba nta ngaruka zagera kuri KNC nyuma yo kwikingiza, yasabye abahungiye mu mashyamba banga kwikingiza ko baza, na bo bakifatanya n’abandi mu kubahiriza iyi gahunda. Ati: “Ubwo rero ba bandi bahungiye mu mashyamba muveyo.”

Na we yahise asaba uyu muganga kumushimangira, maze nyuma y’aho agira ati: “Reka ntegereze ko ndi buhebebe, nintahebeba ubwo abagiye mu bihuru muveyo.”

Bombi bahurije amajwi hamwe basaba abatarishimangiza kubikora, kuko byongera ubudahangarwa mu mubiri, bubarinda kuzahazwa na Covid-19.