Kuri iki Cyumweru gishize Koreya ya Ruguru yatangaje ko ishobora kugerageza igisasu cya missile gifite ubushobozi bwo kwambukiranya imigabane, Intercontinental Ballistic Missile (ICBM) mu cyongereza, igihe cyose n’ahantu hose Kim Jong Un azahitamo, ishimangira ko ibi byose ari ingaruka za politiki mbi ya Leta Zunze Ubumwe za Amerika.
“ICBM izoherezwa igihe cyose n’ahantu hose hazagenwa n’ibiro bikuru by’umuyobozi w’ikirenga wa DPRK (Democratic People’s Republic of Korea)”, uwo ni umuvugizi wa minisiteri y’ububanyi n’amahanga avugana n’Ibiro Ntaramakuru KCNA utatangajwe amazina.
Minisitiri w’ingabo wa Leta Zunze Ubumwe za Amerika, Ash Carter, ku Cyumweru yatangaje ko ubushobozi bwo gucura ibitwaro bya kirimbuzi bwa Koreya ya Ruguru ari ikibazo gikomeye kuri Leta Zunze Ubumwe za Amerika, ndetse ko biteguye kuzarasa bakamanura missile za Koreya ya Ruguru igihe izaba igerageje kuzigerageza.
“Tuzazirasa ari uko ziduteye ikibazo, ni ukuvuga niziza zigana ku butaka bwacu cyangwa ku bw’inshuti zacu,”, uwo ni carter mu kiganiro Meet the Press na NBC.
Kuwa 05 Mutarama nibwo Leta Zunze Ubumwe za Amerika zatangaje ko Koreya ya Ruguru yagaragaje gutera imbere mu bijyanye no gutunganya ingufu za kirimbuzi na za missiles nyuma y’amagerageza yakoze mu mwaka ushize.
Mu gihe Koreya ya Ruguru ivuga ko iri hafi gukora igerageza, ngo bishobora kuyifata indi myaka ngo inoze neza izo ntwaro nk’uko impuguke zivuga.
Mu gihe zaba zimaze gushyirwa mu buryo byuzuye, izi missile zambukiranya imigabane cyangwa ICBM za Koreya ya Ruguru, zishobora guhangayikisha Leta Zunze Ubumwe za Amerika ziherereye mu birometero bitageze ku 10,000 (5,500 Miles) uvuye muri Koreya ya Ruguru. Bivugwa ko za ICBM zifite ubushobozi bwo kuraswa ahantu hareshya byibuze na kilometero 5,500 (3,400 miles), ariko zimwe zikorwa ku buryo zishobora kugera mu birometero 10,000 (6,200 miles) ndetse zikaba zanaharenga.
Kuri uyu wa Mbere, umuvugizi wa minisiteri y’ingabo muri Koreya y’Epfo, Moon Sang-gyun, yise itangazo rya Koreya ya Ruguru ubushotoranyi, anatangariza abanyamakuru ko Koreya ya Ruguru izafatirwa ibihano bikaze niramuka igerageje ICBM.
[xyz-ihs snippet=”google-pub”]
Naho perezida wa Leta Zunze Ubumwe za Amerika uherutse gutorwa, Donald Trump abinyujije kuri twitter yasubije Kim jong un kuri iki cyo kugerageza ICBM, avuga ko bitazaba.
Perezidansi ya Amerika isabwe kugira icyo itangaza kuri iki cyibazo, yagarutse ku byatangajwe n’ushinzwe itangazamakuru muri White House, Josh Earnest kuwa 03 Mutarama, aho yavuzemo ko Amerika yizeye ubwirinzi ifite ku gitero cyaturuka muri Koreya ya Ruguru.
Aha yagarutse ku ngamba z’iubwirinzi zafashwe zirimo kubaka uburyo bwo gukumira missiles bwashyizwe muri Pacifika ndetse no kongera igitutu kuri Koreya ya Ruguru ngo ihagarike gahunda zayo zo gutunganya ingufu za kirimbuzi (nuclear program).
Koreya ya Ruguru iri mu bihano yafatiwe na Loni kuva mu 2006 izira gucura no kugerageza ibitwaro bya kirimbuzi. Ibi bihano byaje gukazwa mu kwezi gushize nyuma y’aho iki gihugu kigeragereje ku nshuro ya gatanu ingufu zacyo za kirimbuzi kuwa 09 Nzeri umwaka ushize.
Kanda hano ujye ubona amakuru yihuse kandi kugihe kuri Facebook no kuri twitter
Dennis Ns./Bwiza.com
