Utubari twemerewe kongera gukora muri Afurika y’Epfo

Perezida wa Afurika y’Epfo, Cyri Ramaphosa, yoroheje amabwiriza yo kwirinda icyorezo cya COVID-19 mu gihugu cye arimo gukomorera icuruzwa ry’ibisindisha.

Perezida Ramaphosa yatangaje iyoroshya ry’ariya mabwiriza, ubwo yishimiraga kwakira doze miliyoni z’inkingo za AstraZeneca zitezweho gutuma Afurika y’Epfo yigaranzura COVID-19.

Yavuze ko igihugu kizaguma mu kiciro cya gatatu cya Guma mu Rugo, ariko avuga ko ingamba zimwe na zimwe zari zarashyizweho zizakurwaho.

Ati: “Ndahamagarira buri umwe wese kunywa inzoga kugira ngo tutazagira ikibazo cy’ihungabana cyangwa ubwiyongere bw’indwara ziterwa n’imyitwarire idahwitse.”

Utubari tudandaza inzoga twemerewe kuzicuruza kuva ku wa Mbere kugeza ku wa Kane hagati ya saa yine z’igitondo na saa kumi n’ebyiri z’umugoroba, mu gihe udufite impushya zo gukora twemerewe gufungura hagati ya saa yine z’igitondo na saa yine z’ijoro.

Isaha y’umukwabu muri Afurika y’Epfo yo igomba kuva saa tanu z’ijoro ikageza saa kumi z’igitondo.

Kuva muri Werurwe umwaka ushize Afurika y’Epfo yafunze utubari incuro eshatu, kugeza ku wa 28 Ukuboza ubwo Guverinoma yatangazaga ko utubari dukomeje gufunga.

Mu buryo bwubahirije amategeko, ubu muri Afurika y’Epfo kandi abantu batarenze 50 bashobora guhurira mu rusengero, mu gihe abatarenze 100 bemerewe guhurira hanze yarwo.

Inyanja, inzuzi, parike na za pisine na byo byemerewe kongera gufungura.

Afurika y’Epfo yoroheje ingamba zo gukumira COVID-19, mu gihe iza imbere muri Afurika mu kugira umubare munini w’abanduye kiriya cyorezo n’abo kishe.

Imibare ya Kaminuza ya Johns Hopkins yerekana ko muri iki gihugu habarurwa abarenga 1,400,000 banduye COVID-19 n’abahitanwe na yo 44,164.

Ibihugu byinshi by’umwihariko byakumiriye ku butaka bwabyo ingendo ziva n’izijya muri Afurika, kubera ubwoko bushya bwa Coronavirus buzwi nka 501Y.V2 variant bivugwa ko bwahagaragaye.

Ni ubwoko bwa Coronavirus bivugwa ko bwandura bukanica vuba ugereranyije n’ubusanzwe.

Perezida Ramaphosa yasobanuye ko ikiciro cya kabiri cya COVID-19 gisa n’ikiri kurangira, ndetse “Impuzandengo y’ubwandu bushya yagiye igabanuka mu byumweru bitatu bishize.”

Yunzemo ati: “Izi mpinduka zashobotse kubera igabanuka rikabije ry’abinjira mu bitaro kubera Covid-19 mu ntara zose, bigabanya igitutu ku bitanda no ku bakozi b’inzego z’ubuzima.”

Inkingo za AstraZeneca Afurika y’Epfo iheruka kwakira, zizabanza guhabwa abakora mu nzego z’ubuzima n’ubwo zikiri nke ugereranyije n’izikenewe 1,250,000.

Afurika y’Epfo ivuga ko yamaze kwemererwa inkingo miliyoni 50, ikaba ifite gahunda yo gukingira abantu miliyoni 40 bangana na 2/3 by’abaturage bayo bitarenze uyu mwaka.