Scott Sinclair wahoze akinira Manchester City yiswe “amazirantoki” n’uwahoze ari umukunzi we Helen Flanagan, umukinnyi wa filime ya nyuma yo kutabira igitaramo cy’ishuri cy’umuhungu wabo kuko yari yagiye kureba Grand Prix ya Abu Dhabi.
Uwahoze ari umukinnyi wa Manchester City, Scott Sinclair, yatewe amagambo akomeye n’uwahoze ari umukunzi we Helen Flanagan, wamwise “igice cy’umwanda w’umuntu”, nyuma y’uko atitabiriye igitaramo cy’ishuri cy’umuhungu wabo w’imyaka ine, Charlie.
Sinclair, ufite imyaka 36, yahisemo kujya muri Leta Zunze Ubumwe z’Abarabu kureba isiganwa rya Formula 1 rya Abu Dhabi mu ntangiriro z’Ukuboza, aho kwitabira uwo muhango w’ingenzi w’umwana we.
Helen Flanagan, w’imyaka 35, umukinnyi wa filime akaba n’umunyamideli, yagaragaje umujinya we abinyujije ku mbuga nkoranyambaga, avuga ko imyitwarire ya Sinclair ari ubugome, ndetse ntiyongera kumukurikira kuri Instagram. Yanditse ati: “Uri igice cy’umwanda. Wabigenje ute ntiwiyerekane ku gitaramo cya Charlie?”
Flanagan na Sinclair bari barasezeranye mu 2018, baza gutandukana mu 2022. Bafitanye abana batatu: abakobwa Matilda w’imyaka 10 na Delilah w’imyaka 7, ndetse n’umuhungu Charlie w’imyaka 4. Bombi bari bemeranyije kwitabira igitaramo cya Charlie, ariko Sinclair ntiyahagera kubera urugendo rwe.
Nyuma yaho, Helen Flanagan yashyizeho indi nkuru kuri Instagram, agaragara ahobera umuhungu we, yandika ati: “Nakunze cyane igitaramo cya Charlie. Ni inyenyeri yanjye, umutima wanjye.”
Ku rundi ruhande, Sinclair yasangije amafoto ye ari i Abu Dhabi kuri Instagram, yishimira uko yanyuzwe n’icyumweru yahagiriye, yandika ati: “Ni icyumweru cyiza cyane – Abu Dhabi F1.”
Urugendo rwe mu mupira w’amaguru Scott Sinclair yakuriye mu ishuri ry’abato rya Bristol Rovers, atangira gukina kinyamwuga mu 2004. Nyuma yimukiye muri Chelsea, aho yamaze imyaka itanu ariko akenshi atizwa mu yandi makipe. Yaje gukinira amakipe akomeye nka Manchester City, Aston Villa na Celtic yo muri Scotland. Mu 2022 yasubiye muri Bristol Rovers, aho yamaze indi myaka itatu.
Mu mpera z’igihembwe cya 2024–2025, Sinclair yarekuwe na Bristol Rovers. Kuri ubu nta kipe afite, kandi ntaratangaza ko yaretse burundu gukina umupira w’amaguru. Bishoboka ko ashaka indi kipe mu isoko ry’igura n’igurisha ryo muri Mutarama.
