Perezida Nkurunziza akaba n’Umugaba w’Ikirenga w’Ingabo z’Uburundi avuga ko uwo ari we wese washaka kugaba igitero ku Burundi, yaba yigerejeho kandi ko byarangira yicuza icyatumye agira icyo gitekerezo.
Mu ijambo risoza icyumweru ishyaka CNDD-FDD riri ku butegetsi mu Burundi ryise icyumweru cy’intwari, yavuze ko urugamba rw’amasasu rwarangijwe n’ishyaka rye ariko ko uwashaka kugarura urwamo rw’imbunda, yabona ko Abarundi barara bakarabye.
Ibi ni bimwe mu byo yagarutseho mu byo yavugiye muri Komini Mubimbi mu ntara ya Bujumbura mu mpera y’icyumweru gishize aho yatangiye avuga iby’urugamba iri shyaka rye ryarwanye n’aho rigeze ubu.
Ati: “Muri CNDD-FDD twarahagaritse intambara burundu, mugabo uzotuvyoronga tuzamwereka ko turya dukarabye, uzigerezaho yatsa umuriro azicuza icyo awakirije.”
Nkurunziza akndi yaburiye abo mu ishyaka CNDD-FDD bashaka guhemuka ko bazaba bahemukiye Imana n’Abarundi, bazabura amahoro.
Yavuze ko nta muntu wahemukiye CNDD-FDD ngo bimugwe amahoro nk’uko BBC dukesha iyi nkuru ibitangaza.
Ati “Erega ubu hoho birakomeye, ibaze Imana tuyiha ikibanza ca mbere muri CNDD-FDD umwaka ushize rero twaravyonyoye tuyiha ikibanza ca mbere mu ibwirizwa shingiro, muzokubitwa kabiri ivyo mube mubizi kandi ntimubifate minenegwe naje kukuburira.”
Bwana Nkurunziza ntiyaciye ku ruhande yavuze ko abwira (abayoboke ba CNDD-FDD) gusa hamwe n’abaciye muri iri shyaka.
Ati “Imana iriteguye neza neza gukubitisha inkoni y’icyuma umugumyabanga azohirahira ahemuke.”
Iri shyaka rizaba rihanganye n’ayandi mu matora y’umukuru w’igihugu ateganyijwe umwaka utaha, kugeza ubu ntabwo riratangaza umukandida waryo muri ayo matora.
Bwana Nkurunziza akaba yaremeje ko ataziyamamaza muri ayo matora.
Perezida Nkurunziza aravuga ibyo guhashya uwahirahira yatsa umuriro mu gihe muri ibi bihe RED-TABARA yatangaje ku buryo bweruye ko igiye guhangana na Leta ye mu buryo bw’intambara.
Aba banahise bagaba igitero mu Ntara ya Bubanza ariko bahabwa isomo rikomeye kuko bishwemo 14, abandi batari bake bagafatwa mpiri (rwa mikono) mu gihe Leta yatakaje umupolisi umwe.
