Ikigo cya Repubulika ya Demukarasi ya Congo gishinzwe kurengera ibidukikije, ICCN, cyatangaje ko abarinzi ba Pariki ya Virunga bari kumwe n’abasirikare bishe abarwanyi babiri b’umutwe witwaje intwaro wa FDLR ukomoka mu Rwanda, undi afatwa mpiri.
Nk’uko itangazo rya ICCN ribivuga, byabereye mu mirwano y’aba barinzi ndetse na FDLR yari yabategeye igico rwagati muri iyi pariki, hagati y’agace ka Mabenga na Kasali muri Teritwari ya Rutshuru.
ICCN yagize iti: “Ku wa Mbere, itsinda rya ICCN n’abasirikare ryari ku burinzi hagati ya Mabenga na Kasali ryaguye mu gico cy’abarwanyi ba FDLR. Umwe mu bagize iri tsinda yakomerekejwe n’isasu, abanzi babiri barapfa, undi atabwa muri yombi n’intwaro yari afite ya AK47.”
Abarwanyi ba FDLR nibo bakunze kumvikana muri Pariki ya Virunga, bahangana n’abarinzi bayo. Muri Mata 2020, yigeze kwica abarinzi 12 ahaherera muri iyi teritwari.
