Umunyezamu w’ikipe y’igihugu ya Pologne, Wojciech Szczesny, yanditse amateka mabi ejo ku wa Mbere yo kuba umunyezamu wa mbere mu mateka y’irushanwa rya Euro witsinze igitego.
Szczesny n’ikipe y’igihugu cye cya Pologne bari bahuye n’ikipe y’igihugu ya Slovakia, mu mukino wa mbere wabo mu irushanwa rya Euro 2020 batsinzwemo ibitego 2-1.
Byasabye umunota wa 18 w’umukino kugira ngo Pologne itsindwe igitego cya mbere, ku makosa y’umuzamu Szczesny witsinze igitego agahita aba umunyezamu wa mbere w’itsinze mu mateka ya Euro.
Ni igitego uyu mugabo ukinira Juventus yitsinze, nyuma y’umupira Robert Mak yazamukanye ku ruhande rw’ibumoso, acenga ba myugariro babiri ba Pologne mbere yo kurekura ishoti rikomeye.
Ni ishoti ryagonze igiti cy’izamu, gusa ku bw’amahirwe ya Slovakia umupira mu kugaruka wagonze umutwe wa Szczesny uruhukira mu nshundura.
Umunyezamu Wojciech Szczesny igitego yitsindaga cyabaye icya kabiri cyitsinzwe muri Euro 2020.
Ni inyuma y’icyo myugariro Merih Demiral na we ukinira Juventus yitsinze, mu mukino ufungura Euro ikipe y’igihugu cye cya Turkiya yatsinzwemo n’u Butaliyani ibitego 3-0.
Kurikira ibiganiro n’amavidewo binyura kuri Bwiza TV
