Ikipe ya FC Barcelona yaraye yegukanye igikombe kiruta ibindi muri Espagne (Super Coupe), nyuma yo gutsinda ku mukino wa nyuma mukeba wayo Real Madrid ibitego 3-1.
Amakipe yombi yari yahuriye mu mukino wa nyuma wabereye i Riyad mu murwa mukuru wa Arabie Saoudite.
Real Madrid muri ½ cy’irangiza yari yasezereye Valencia kuri Penaliti nyuma yo kugwa miswi igitego 1-1, mu gihe FC Barcelona na yo yari yasezereye Real Betis kuri Penaliti nyuma yo kunganya ibitego 2-2.
Iyi kipe y’umutoza Xavi Hernandez yihariye igice cya mbere cy’umukino, ndetse ikirangiza iri imbere n’ibitego 2-0.
Ni ibitego byashoboraga kwiyongera kuko ku munota wa 19 w’umukino Robert Lewandowski yateye ishoti riremereye, umunyezamu Thibaut Cortois arikuyemo rigonga igiti cy’izamu.
Byabaye ngombwa ko uyu mupira ugarukira myugariro Alejandro Balde wawuteye n’akaguru k’ibumoso uca hanze y’izamu.
Byasabye umunota wa 32 w’umukino ngo FC Barcelona ifungure amazamu ibifashijwemo na Pablo Gavi, ku mupira uyu musore ukiri muto yari ahawe na Robert Lewandowski.
Uyu rutahizamu w’umunya-Pologne yatsinze igitego cya kabiri ku munota wa 44 ku mupira yari ahinduriwe na Gavi, bituma Barça ijya kuruhuka iri imbere n’ibitego 2-0.
Igice cya kabiri cy’umukino cyaranzwe n’impinduka nyinshi ku ruhande rwa Real Madrid zasize umutoza Carlo Ancelotti ahaye umwanya abarimo Rodrygo Goes, Dani Ceballos, Nacho Fernandes na Marco Asensio.
Ni impinduka kandi zasize abarimo Edouardo Camavinga, Luka Modric, Toni Kroos na Eder Miltao batanze umwanya.
Barcelona yashimangiye intsinzi ku munota wa 68 biciye kuri Pedri Gonzalez wari uhinduriwe umupira mwiza na Gavi.
Ni igitego cyinjiye nyuma y’iminota mike Ousmane Démbéle ahinduriwe umupira mwiza na Gavi, awuteye umunyezamu Thibaut Cortois awukuzamo ibirenge.
Real Madrid yari yaranzwe no kugeragereza amashoti menshi hanze gato y’izamu gusa agakurwamo n’umunyezamu Marc-André Ter Stegen yabonye impozamarira ku munota wa 90+2.
Hari ku mupira Dani Ceballos yahinduriye Karim Benzema wari mu rubuga rw’amahina, awuteye mu izamu ukurwamo na Ter Stegen, gusa biba ngombwa ko umugarukira awutera mu nguni y’izamu.
Igikombe FC Barcelona yatwaye ni cyo cya mbere yatwaranye n’umutoza Xavi Hernandez usanzwe ari n’umunyabigwi wayo, nyuma yo kuyigeramo mu mwaka ushize.
