Umugore wo mu karere ka Kisii, mu majyepfo ashyira uburengerazuba bwa Kenya, yabyaye abana bane icyarimwe abita amazina yakomotse kuri Raila Odinga wahoze ari Minisitiri w’Intebe wa Kenya, ndetse n’umugore we Ida Odinga.
Abo bana bane ba Vane Nyanchoka ni abahungu batatu n’umukobwa umwe. Abahungu babatijwe Raila, Amollo, na Odinga, naho umukobwa yitwa Ida, izina ry’umugore wa Raila Odinga.
Mu kiganiro yagiranye na televiziyo Citizen TV yo muri Kenya, Nyanchoka yavuze ko yahisemo ayo mazina kubera urukundo n’icyubahiro afitiye Raila Odinga.
Yagize ati: “Natekerezaga ko nzabyara abana batatu gusa, ariko nasamye bane. Icyo kintu cyantunguranye cyane, kandi nakibonye nk’umugisha ukomeye Imana yangiriye.”
Nyanchoka yari asanzwe afite impanga ebyiri, bityo ubu afite abana batandatu bose hamwe.
Umuvandimwe we witwa Everleen Ontweka nawe yemeje ko ayo mazina yatoranyijwe nk’uburyo bwo gukomeza guha icyubahiro Raila Odinga, wari intwari yabo kandi wapfuye vuba aha.
Raila Odinga, wabaye Minisitiri w’Intebe wa Kenya ndetse akaba yarakoze politiki yo guhangana n’ubutegetsi igihe kirekire, yitabye Imana ku itariki ya 15 Ukwakira 2025 azize umutima ubwo yari kwivuza amaso mu Buhinde.
