Umunyamerika Damon Foy w’imyaka 50 yemeye icyaha cyo kwica Alberta Dale w’imyaka 44, wahoze ari umukunzi we, nyuma y’uko umubano wabo urangiye.
Foy wo muri Kerhonkson, muri Leta ya New York, yemeye icyaha cyo kwica mu rubanza rujyanye n’urupfu rwa Dale, wari utuye muri Leta ya Pennsylvania, mu 2024.
Nk’uko Ubushinjacyaha bwa Ulster County bwabitangaje, hagati ya tariki ya 31 Werurwe na tariki ya 1 Mata 2024, Foy yishe Dale, nyuma atangira gushaka uko ahisha umurambo we, ariko inzego z’umutekano ziramuvumbura7.
Iperereza ryatangiye ku wa 1 Mata 2024, nyuma y’uko umuryango wa Dale uhamagaye inzego z’umutekano uzibwira ko uhangayikishijwe n’umutekano we. Icyo gihe, abapolisi babanje kugenzura aho yari aherereye, nyuma batangira iperereza ku ibura rye.
Ku wa 2 Mata, abapolisi bagarutse kwa Foy kumubaza ibibazo, nyuma y’uko telefoni ya Dale ibonetse iruhande rw’umuhanda, igashyikirizwa inzego z’umutekano.
Inyandiko z’urukiko zivuga ko igihe abashinzwe iperereza bageraga iwe, Foy yababwiye ko Dale yari mu nzu, ndetse akemera ko ari we wamwishe.
Abapolisi bahise basaka inzu ye babiherewe uruhushya n’urukiko, basanga mu ivarisi yari mu kabati harimo ibice by’umurambo wa Dale, birimo umutwe we. Ibindi bice by’umurambo ntibyabonetse mu gihe cy’iryo perereza.
Inyandiko z’urukiko kandi zigaragaza ko Foy yari asanzwe akekwaho ihohoterwa rikorerwa mu mibanire yabo. Dale yari yarabwiye inzego z’umutekano ko aramutse aburiwe irengero, byashoboraga kuba byatewe na Foy.
Mu masezerano yo kwemera icyaha, Foy ategerejwe guhanishwa igifungo cy’imyaka 23 kugeza kuri burundu, nk’uko ikinyamakuru Daily Freeman cyabitangaje.