Umugabo w’imyaka 45 wo muri Indonesia yatawe muri yombi akurikiranyweho kwica umuturanyi we w’imyaka 60, nyuma yo kurakazwa no kuba uyu mugabo yarakundaga kumubaza impamvu atararongora.
Ibi byabereye mu gace ka South Tapanuli, mu ntara ya North Sumatra, ku wa 29 Nyakanga 2024.
Uwishwe yitwaga Asgim Irianto, wahoze ari umukozi wa Leta. Polisi yavuze ko ukekwaho kumwica, Parlindungan Siregar, yageze iwe ahagana saa mbili z’ijoro afite igiti, maze atangira kumukubita.
Asgim yagerageje guhungira mu muhanda, ariko Siregar aramukurikira ndetse amukubita ku mutwe. Abaturage bahise batabara bahagarika icyo gikorwa, maze bajyana Asgim kwa muganga, ariko aza gupfa ataragerayo.
Polisi yahise ifata Siregar mu gihe kitarenze isaha imwe nyuma y’igitero.
Mu ibazwa, Siregar yabwiye polisi ko yari yararakajwe n’uko Asgim yahoraga amunnyega kubera kugira imyaka 45 atararongora.
Raporo za polisi kandi zagaragaje ko aba baturanyi bari basanzwe bafitanye amakimbirane.