Tariki ya 23 Mata 2005, Jawed yashyize kuri YouTube videwo y’amasegonda 19 yitwa Me at the Zoo (Njyewe ku rwororero rw’inyamaswa). Iyi videwo ni yo ya mbere yashyizwe kuri uru rubuga kuva rwafungurwa tariki ya 14 Gashyantare 2005, ikaba imaze kurebwa inshuro zirenga miliyoni 90 gusa ariko si yo yarebwe cyane.
Videwo 10 zarebwe cyane kuri uru rubuga zose zasohotse hagati ya 2012 na 2017. Igiteranyo cy’inshuro zimaze kurebwa (views) kirenga miliyari 42. Iyarebwe gake kuri uru rutonde, ibarirwa muri miliyari eshatu, mu gihe iyarebwe kenshi iri hafi kugeza kuri miliyari 7.Buri videwo muri izi 10 ifite umwihariko wayo, watumye umubare w’abayireba uba mwinshi, kugeza ubu abenshi bakaba bagifite inyota yo kuzireba.
IZI NI VIDEWO 10 ZAREBWE CYANE
10. Roar
Iyi ni indirimbo y’umuhanzi w’Umunyamerikakazi, Katy Perry yashyize kuri YouTube tariki ya 18 Ukwakira 2013. Mu mashusho y’iyi ndirimbo yatunganyirijwe (arimo ubuhanga bwo kurema ibitarigeze bibaho) hagaragaramo inyamaswa nk’urusamagwe. Kugeze ubu ‘Roar’ imaze kurebwa inshuro miliyari 3 na miliyoni zirenga 50.
9. Sugar
Iyi ndirimbo ni iy’itsinda rya Maroon 5, yashyize kuri YouTube tariki ya 13 Mutarama 2015. Igaragaramo amashusho y’umugeni n’abasore bambaye amakote bari mu birori by’ubukwe. Mu myaka irenga itanu imaze kuri uru rubuga, Sugar imaze kurebwa inshuro miliyari 3 na miliyoni zirenga 173.
8. Sorry
Iyi ni indirimbo y’umunya-Canada, Justin Bieber yashyize kuri YouTube tariki ya 23 Ukwakira 2015. Amashusho agaragaramo abakobwa beza bifashishijwe mu mbyino igezweho. Mu myaka irenga ine iyi ndirimbo imaze kuri uru rubuga, imaze kurebwa inshuro miliyari 3 na miliyoni zirenga 275.
7. Gangnam Style
Ni indirimbo y’umuhanzi w’umunya-Koreya y’Epfo witwa PSY, yageze kuri YouTube tariki ya 15 Nyakanga 2012. Igaragaramo imbyino bidasanzwe [isa n’urwenya] yitiriwe agace ka Gangnam kari muri iki gihugu nk’uko n’izina ry’indirimbo ubwayo ibisobanura. Mu myaka irenga irindwi ‘Gangnam Style’ imaze kuri uru rubuga, yarebwe inshuro miliyari 3 na miliyoni zirenga 586.
6. Uptown Funk
Ni indirimbo yahuriwemo n’Abanyamerika babiri; Bruno Mars na Mark Ronson, yashyizwe kuri YouTube tariki ya 10 Ugushyingo 2014. Igaragaramo imibyinire idasanzwe isa n’urwenya [ikozwe mu buryo busa n’umukino]. Mu myaka irenga itanu iyi ndirimbo imaze kuri uru rubuga, imaze kurebwa inshuro miliyari 3 na miliyoni zirenga 826.
5. Masha and the Bear-Recipe for Disaster
Ni agace k’uruhererekane rw’umukino w’abana gatunganywa n’Abarusiya. Gafite umwihariko wo kuba ari ak’ibitente (Cartoon) by’inyamaswa zitandukanye utuma gakurura abakareba. Aka gace kuva kagera kuri uru rubuga tariki ya 31 Mutarama 2012, kamaze kurebwa inshuro miliyari 4 na miliyoni zirenga 261.
4. See You Again
Ni indirimbo yakozwe n’abahanzi babiri b’Abanyamerika; Wiz Khalifa na Charlie Puth, yashyizwe kuri YouTube tariki ya 10 Nyakanga 2017. Umwihariko wayo ni uko yaririmbiwe icyamamare mu mukino wa filime, nyakwigendera Paul Walker wishwe n’impanuka y’imodoka. ‘See You Again’ imaze kurebwa inshuro miliyari 4 na miliyoni zirenga 513.
3. Shape of You
Ni indirimbo y’umuhanzi Ed Sheeran yashyize kuri YouTube tariki ya tariki ya 30 Mutarama 2017. Ifite umwihariko w’amagambo ayigize (lyrics) yasanishije n’umukobwa witwa Jennie Pegouskie uri mu mashusho usanzwe ari umubyinnyi n’umunyamideri. Mu myaka imaze kuri uru rubuga, Shape of You imaze kurebwa inshuro miliyari 4 na miliyoni zirenga 740.
2. Baby Shark Dance
Ni indirimbo igaragaramo imbyino y’ibitente (cartoon) bikozwe mu nyamaswa zitandukanye bikundwa n’abana, by’umwihariko. Iri kuri Channel ya YouTube y’Abanya-Koreya y’Epfo yitwa ‘Pinkfong Kids’ Songs’. Kuva iyi videwo yashyirwa kuri uru rubuga tariki ya 18 Kamena 2016, imaze kurebwa inshuro miliyari 5 na miliyoni zirenga 150.
1. Despacito
Ni indirimo yakozwe n’abahanzi; Luis Fonsi na Daddy Yankee bo muri Puerto Rico bakunze gukoresha ururimi rw’Icyespanyol (rumwe mu ndimi zikunzwe muri iki gihe), ikaba kandi igaragaramo imbyino yihariye ku muhanzi Yankee. Kuva yagera kuri uru rubuga tariki ya 13 Mutarama 2017, iyi ndirimbo imaze kurebwa inshuro miliyari 6 na miliyoni zirenga 730.
SRC: YouTube, popsongprofessor na The Independent.
